អតីតមេដឹកនាំខ្មែរក្រហមមួយរូបគឺ លោក ខៀវ សំផន បានទម្លាក់កំហុសទៅលើមេដឹកនាំបក្សកាន់អំណាចថា បានបើកដៃឲ្យវៀតណាមប្រើឥទ្ធិពលសម្រេចផែនការលេបទឹកដីកម្ពុជា។
ក្នុងសវនាការលើសំណុំរឿង០០២វគ្គ២ ដែលធ្វើឡើងនៅសាលាក្តីខ្មែរក្រហមនៅថ្ងៃទី២៤ខែមិថុនានេះ លោក ខៀវ សំផន បានច្រានចោលថា របបកម្ពុជាធិបតេយ្យរបស់លោកមិនបានសម្លាប់ពលរដ្ឋខ្មែរស្លូតត្រង់ និងពលរដ្ឋវៀតណាមដូចការចោទប្រកាន់ទេ។
ផ្ទុយទៅវិញ លោក ខៀវ សំផន ចោទថាបញ្ហាទាំងអស់នោះជាការប្រឌិតរបស់វៀតណាម ដែលលោកថាដើម្បីសម្រេចបំណងចង់លេបទឹកដីកម្ពុជា។
លោកថា៖ «តើវៀតណាម បានផលចំណេញយ៉ាងណាពីការឃោសនាមួលបង្កាច់នេះ? គឺគេអាចសម្រេចបំណងវាទីលេបទឹកដីកម្ពុជាបាន។ សព្វថ្ងៃវៀតណាមកំពុងតែកេងចំណេញពីទឹកដីកម្ពុជាទាំងគោគទាំងទន្លេបឹងបួទាំងសមុទ្ររួចទៅហើយ តាមរយៈការព្រមព្រាងរបស់មេដឹកនាំខ្មែរសព្វថ្ងៃនេះ។ ប៉ុន្តែលើសពីនេះទៅទៀត អាចនឹងទទួលបានអំណោយមួយ ដែលពួកគេមិនបានរំពឹងទុកជាមុន គឺដាក់ទោសខ្ញុំពីឧក្រិដ្ឋកម្មប្រល័យពូជសាសន៍ ជនជាតិវៀតណាម ក្នុងរបបកម្ពុជាប្រជាធិបតេយ្យ»។
លោក ខៀវ សំផន បានបង្ហាញការខកចិត្ត ដោយថា សាលាក្តីកូនកាត់មួយនេះ មិនអាចនាំមេដឹកនាំវៀតណាមមួយចំនួនមកតតាំងក្តីជាមួយលោកបាន។
លោក ខៀវ សំផន លើកឡើងទៀតថា បើការពិតមិនត្រូវលាតត្រដាង លោកថាវៀតណាមនឹងថ្កោលទោសកម្ពុជានៅថ្ងៃណាមួយពីអំពើប្រល័យពូជសាសន៍នេះ។
លោកថា៖ «បើប្រសិនជាអញ្ចឹងមែននោះ យើងនឹងមើលឃើញហេតុការណ៍ដ៏អាក្រក់គួឲ្យអាម៉ាសកើតឡើង គឺថាវៀតណាមនឹងស្នើឲ្យអ្នកដឹកនាំដែលអនុញ្ញាតិឲ្យខ្លួនចូលមកគ្រប់គ្រងប្រទេសកម្ពុជារបស់យើង។ ពោលគឺបងធំជើងកាងទាំង៣របស់គណបក្សប្រជាជនកម្ពុជា ធ្វើការសុំទោសជាផ្លូវការ ក្នុងនាមកម្ពុជា ចំពោះអំពើប្រល័យពូជសាសន៍នៅកម្ពុជាលើជនជាតិវៀតណាម»។
អតីតមេដឹកនាំកំពូលៗ របស់ខ្មែរក្រហម៤នាក់ មាន នួន ជា, កាំង ហ្កេចអ៊ាវ ហៅឌុច, អៀង សារី, អ្នកស្រី អៀង ធារិទ្ធិ និងលោក ខៀវ សំផន ត្រូវសាលាក្តីខ្មែរក្រហមនាំខ្លួនមកកាត់ទោសចោទច្រើនបទល្មើស រួមទាំងបទឧក្រិដ្ឋកម្មប្រឆាំងនឹងមនុស្សជាតិផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រតិកម្មដោយប្រើពាក្យធ្ងន់ៗ វាយបកទៅលោក ខៀវ សំផន វិញដូចនេះថា៖ «ខៀវ សំផន និយាយអញ្ចឹងបានគល់ឫស្សី មិនមែនការកាត់ទោសតាមផ្លូវច្បាប់ទេ។ អ្នកណាក៏ដឹងដែរពលរដ្ឋរាប់លានាក់ ដែលទទួលមរណភាព ត្រូវវាយសម្លាប់ចោល ដោយស្រស់ៗអាហ្នឹងអ្នកណាអ្នកវ៉ៃសម្លាប់គឺពួកខ្មែរក្រហមក្បាលរឹងហ្នឹងហើយ ដែលមានបញ្ជាពី ប៉ុល ពត ខៀវ សំផន និង នួន ជា នឹងឯង»។
សាស្ត្រាចារ្យប្រវិត្តិសាស្ត្រ លោក វង់ សុធារ៉ា លើកឡើងថា ការលើកឡើងរបស់លោក ខៀវ សំផន លោក ថា ជាឧទាហរណ៍មួយមួយទៀត បង្ហាញពីទម្លាប់អាក្រក់របស់អ្នកនយោបាយខ្មែរ ដែលលោកថា មិនចេះទទួលស្គាល់ការពិតកំហុសរបស់ខ្លួន។
យ៉ាងណាក៏ដោយ ក្នុងសវនាការសំណុំរឿង ០០២/០២ នៅថ្ងៃនេះ លោក ខៀវ សំផន បានសុំទោស ដល់ព្រលឹងអ្នកស្លាប់ អំឡុងទសវត្សរ៍៧០ ដែលលោកបានកាន់អំណាចនោះ៕
