បុរសម្នាក់ ត្រូវបានសមត្ថកិច្ចចាប់ខ្លួនកាលពីថ្ងៃមុន នៅក្នុងស្រុកសំពៅលូន ខេត្តបាត់ដំបង ដោយសង្ស័យថា មានជាប់ពាក់ព័ន្ធនឹងការជួញដូរអាវុធធុនធ្ងន់ឆ្លងដែនទៅប្រទេសថៃ។ នេះដោយយោងតាមសេចក្ដីរាយការណ៍របស់វេបសាយនគរបាលជាតិ។
វេបសាយដដែលនេះ បានឲ្យដឹងបន្ថែមថា បុរសឈ្មោះ ជឹម លីន អាយុ ៣៦ឆ្នាំ រស់នៅក្នុងភូមិឈើទាល ឃុំសិរីមានជ័យ ត្រូវបានកម្លាំងសន្តិសុខមកពីស្រុកសំពៅលូន និងស្រុកម៉ាឡៃ ចាប់ខ្លួន និងបញ្ជូនទៅស្នងការដ្ឋានគរបាលខេត្តបន្ទាយមានជ័យ កាលពីរសៀលថ្ងៃទី២១ ខែកក្កដានេះ។
គេហទំព័រនគរបាលជាតិ បានឲ្យដឹងទៀតថា បុរសម្នាក់ និងជនសង្ស័យដែលស្ថិតក្រោមការតាមចាប់ខ្លួនដទៃទៀត ត្រូវបានសង្ស័យថា មានជាប់ពាក់ព័ន្ធនឹងការជួញដូរអាវុធធុនធ្ងន់ឆ្លងដែនចូលទៅក្នុងទឹកដីថៃ បន្ទាប់ពីតម្រួតថៃបានចាប់ខ្លួនមនុស្ស ៥នាក់ ជាប់ពាក់ព័ន្ធនៅក្នុងឧក្រិដ្ឋកម្មជួញដូរអាវុធខុសច្បាប់នេះ៕
