តុលាការកំពូលថៃ បានកំណត់យកថ្ងៃទី២៥ ខែសីហា ជាកាលបរិច្ឆេទនៃការប្រកាសសេចក្ដីសម្រេចក្ដីប្រឆាំងនឹងអតីតនាយករដ្ឋមន្ត្រី អ្នកស្រី យីងឡាក់ ស៊ីណាវ៉ាត់ ដែលត្រូវបានចោទប្រកាន់ថា បានធ្វើឲ្យខាតបង់ប្រាក់រាប់ពាន់លានដុល្លារនៅក្នុងផែនការស្រូវអង្ករ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
អ្នកស្រី យីងឡាក់ ដែលត្រូវបានពួកយោធាទម្លាក់ពីអំណាចនៅក្នុងរដ្ឋប្រហារកាលពីឆ្នាំ២០១៤នោះ ប្រឈមមុខនឹងការជាប់ពន្ធនាគារដល់ទៅ ១០ឆ្នាំ ប្រសិនបើតុលាការរកឃើញថា អ្នកស្រីមានទោស នៅក្នុងសំណុំរឿងដែលកំពុងដំណើរការទៅអស់រយៈពេល ១៨ខែមកហើយនោះ។ កាលពីថ្ងៃសុក្រកន្លងមកនេះ គឺជាថ្ងៃចុងក្រោយសម្រាប់ស្ដាប់សក្ខីកម្ម។ តុលាការថៃនិយាយថា អ្នកស្រី យីងឡាក់ អាចធ្វើដោះបន្ទុកលើកចុងក្រោយនៅថ្ងៃទី១ ខែសីហា។
អ្នកស្រី យីងឡាក់ និងបក្សផឿថៃ និយាយថា សំណុំរឿងនេះមានលក្ខណៈនយោបាយ មានបំណងបន្ថយប្រជាប្រិយភាពនៃគោលនយោបាយមួយ ដែលបានជួយក្រុមលោក ថាក់ស៊ីន ឲ្យទទួលបានជោគជ័យនៅរៀងរាល់ការបោះឆ្នោតចាប់តាំងពីឆ្នាំ២០០១មក។ បងប្រុសអ្នកស្រី យីងឡាក់ លោក ថាក់ស៊ីន គឺជាអ្នកដាក់ចេញគោលនយោបាយស្រូវអង្ករដំបូងគេ មុននឹងលោកត្រូវបានបណ្ដេញចេញពីអំណាចក្នុងរដ្ឋប្រហារកាលពីឆ្នាំ២០០៦៕
