មនុស្ស ២នាក់ ដែលជាបុគ្គលិកបម្រើការនៅក្រុមហ៊ុនអាកាសចរណ៍មួយក្នុងខេត្តសៀមរាប ត្រូវបានសមត្ថកិច្ចឃាត់ខ្លួនកាលល្ងាចថ្ងៃម្សិលមិញនេះ បន្ទាប់ពីបង្ហោះព័ត៌មានលើបណ្ដាញសង្គមថា មានយន្តហោះមួយគ្រឿងធ្លាក់នៅក្នុងខេត្តនេះ។
ទំព័រហ្វេសប៊ុករដ្ឋបាលខេត្តសៀមរាប បានរៀបរាប់ថា យុវជន ផាវ សុជុំ អាយុ ២៣ឆ្នាំ ជាម្ចាស់គណនីហ្វេសប៊ុកឈ្មោះ Badet Panha Ratanakនិងយុវតី ពន្លឺ លាភា ដែលសុទ្ធតែជាបុគ្គលិកបម្រើការនៅក្រុមហ៊ុនអាកាសចរណ៍ Sky Angkor Air ផងនោះ ត្រូវបានឃាត់ខ្លួនយកទៅសាកសួរ បន្ទាប់ពីពួកគេបានបង្ហោះព័ត៌មានថា យន្តហោះបានឈប់ទាំងស្រុង និងចុះចតដោយសុវត្ថិភាពនៅសៀមរាប។
ចំណែកអ្នកនាំពាក្យលេខាធិការដ្ឋានអាកាសចរណ៍ស៊ីវិលកម្ពុជា លោក ស៊ីន ចាន់សិរីវត្ថា ត្រូវបានដកស្រង់សម្ដីចុះផ្សាយថា មិនមានយន្តហោះធ្លាក់ដូចដែលព័ត៌មានផ្សព្វផ្សាយលើបណ្ដាញសង្គមនោះឡើយ៕
