ក្រុមមន្ត្រីនិងក្រុមបះបោរភូមាបាននិយាយកាលពីថ្ងៃម្សិលមិញថា ប្រមុខអង្គការសហប្រជាជាតិ លោក បាន គីមូន នឹងចូលរួមសន្និសីទសន្តិភាពដ៏សំខាន់មួយនៅក្នុងប្រទេសភូមានៅក្នុងខែនេះ ដែលនឹងជំរុញដល់កិច្ចខិតខំប្រឹងប្រែងរបស់លោកស្រី អ៊ុងសាន ស៊ូជី ក្នុងការបញ្ចប់សង្គ្រាមដ៏រ៉ាំរ៉ៃរាប់ទសវត្សរ៍។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
AFP បានផ្សាយថាជម្លោះជនជាតិភាគតិចជាច្រើនកំពុងតែបន្តកើតមាននៅតាមព្រំដែនភូមា ដែលធ្វើឲ្យអន្តរាយដល់កិច្ចខិតខំប្រឹងប្រែងពង្រីកសេដ្ឋកិច្ចរបស់ប្រទេស ក្រោយការបញ្ចប់ទៅនៃរបបគ្រប់គ្រងយោធា។
លោកស្រី ស៊ូជី បានបង្កើតគោលនយោបាយសន្តិភាពនៅក្នុងរដ្ឋាភិបាលស៊ីវិលថ្មីរបស់លោកស្រី។
លោក Zaw Htay អគ្គនាយករងនៃខុទ្ទកាល័យប្រធានាធិបតីបាននិយាយថា អគ្គលេខាធិការអង្គការសហប្រជាជាតិ លោក បាន គីមូន នឹងមានវត្តមាន។
ចំណែកលោក Saw Kwe Htoo Win តំណាងមកពីសហព័ន្ធជាតិជនជាតិការ៉ែនដែលជាក្រុមឧទ្ទាមធំបំផុតនៅភូមាបានបន្ថែមថា អគ្គលេខាធិការអង្គការសហប្រជាជាតិនឹងចូលរួមថ្លែងសុន្ទរកថា ប៉ុន្តែលោកពុំទាន់ដឹងពីកាលបរិច្ឆេទជាក់លាក់នៅឡើយទេ។
វត្តមានលោក បាន គីមូន នឹងជួយប្រមូលផ្ដុំការគាំទ្រពីអន្តរជាតិទៅដល់កិច្ចខិតខំប្រឹងប្រែងជំរុញសន្តិភាពរបស់លោកស្រី ស៊ូជី។ ក្រុមឧទ្ទាមមួយចំនួន ដែលបានប្រយុទ្ធនឹងកងទ័ពជាតិអស់ច្រើនទសវត្សរ៍មកហើយនោះ បានចុះហត្ថលេខាលើបទឈប់បាញ់រួចហើយ ប៉ុន្តែបទឈប់បាញ់ទាំងនោះផុយស្រួយ។ ចំណែកក្រុមដទៃទៀត បានបដិសេធចុះហត្ថលេខាលើបទឈប់បាញ់ ហើយពួកគេនៅតែធ្វើសកម្មភាពប្រយុទ្ធប្រឆាំងនឹងយោធារដ្ឋាភិបាល៕