ប្រជាពលរដ្ឋមួយចំនួននៅរាជធានីភ្នំពេញ បានត្អូញត្អែរពីការតំឡើងថ្លៃប្រេងឥន្ធនៈនៅកម្ពុជា ដោយថាតម្លៃនេះឡើងលើសពីមុនប្រហែល៥០០រៀលក្នុងមួយលីត្រ បើធៀបនឹងឆ្នាំ២០១៦។
នៅតាមស្ថានីយប្រេងឥន្ធនៈមួយចំនួនក្នុងរាជធានីភ្នំពេញ តម្លៃប្រេងឥន្ធនៈ(ប្រេងសំាង ម៉ាស៊ូត)ក្នុងមួយលីត្រជិត៤០០០រៀល ដោយតម្លៃនេះឡើងលើសប្រហែល៥០០រៀល បើធៀបនឹងឆ្នាំ២០១៦ តម្លៃប្រហែល៣១០០ទៅ៣៣០០រៀលក្នុងមួយលីត្រតែប៉ុណ្ណោះ។
អ្នកនាង សឿ សារិទ្ធ មានប្រសាសន៍ថា ការឡើងថ្លៃប្រេងសំាងនេះ ជាចំណែកមួយដែលធ្វើឲ្យប៉ះពាល់ដល់ជីវភាពប្រជាពលរដ្ឋ។ អ្នកនាងបន្តថា៖ «ពេលសំាងឡើងថ្លៃទៀត ហើយពេលស្ទះ(ស្ទះចរាចរណ៍)ទៀត ដូចថាប្រជាកសិករដឹកអីវ៉ាន់មកពីក្រៅក្រុង មកចូលដល់ក្រុងវាពិបាក ហើយវាអស់ចំណាយកាន់តែច្រើនជាងមុន វាជាផ្នែកមួយដែលធ្វើឲ្យប៉ះពាល់ដល់លើជីវភាពមួយផងដែរ»។
បុគ្គលិកក្រុមហ៊ុនឯកជន លោក កែវ ចិន្តាតុលា បានត្អូញត្អែរថា សំាងឡើងថ្លៃជាដើមចមធ្វើឲ្យទំនិញឡើងថ្លៃតាមនោះដែរ។ លោកថាករណីនេះធ្វើឲ្យគ្រួសារគាត់ជួបបញ្ហាប្រឈម ដោយសារចំណាយច្រើនជាងចំណូល។លោកបន្ថែមថា៖ «ឥឡូវនេះការងារយើង ការរកស៊ីអីក៏វាមិនបាន រកប្រាក់ចំណូលបានច្រើនដូចប្រទេសគេជិតខាងដ៏ទៃទៀតដែរ យើងរកចំណូលប្រាក់ខែបានតិច ឬក៏ប្រាក់ចំណូលបានតិចតែប៉ុណ្ណោះ បើសិនជាសំាងឡើងថ្លៃបានន័យថាយើងត្រូវចំណាយ ប្រាក់ចំណូលយើងបាត់បង់មួយភាគទៅខាងសំាងទៅហើយ យើងពិបានធ្វើអ្វីមួយទៅថ្ងៃមុខ»។
លើសពីនេះទៀត លោក កែវ ចិន្តាតុលា ក៏បានបង្ហាញពីភាពធុញទ្រាន់ពេលធ្វើដំណើរក្នុងរាជធានីភ្នំពេញមានការកកស្ទះជារៀងរាល់ថ្ងៃ និងធ្វើឲ្យខាតបង់ពេលវេលា និងសំាងច្រើនផងដែរ។
បុគ្គលិកក្រុមហ៊ុនឯកជន កញ្ញា ហ៊ី ចាន់ថៃ ស្នើទៅរដ្ឋាភិបាលជួយអន្តរាគមន៍ទៅស្ថាប័នពាក់ព័ន្ធឲ្យពិនិត្យឡើងវិញលើក្រុមហ៊ុនប្រេងសំាង ដោយថាឲ្យលក់តម្លៃសមរម្យ ដែលប្រជាពលរដ្ឋអាចទទួលយកបាន។ កញ្ញាលើកឧទាហរណ៍ថា៖ «សុំស្នើឲ្យគាត់បញ្ចុះថ្លៃសំាងទៅ ព្រោះពួកខ្ញុំអ្នកធ្វើការ ដ៏ពេលចំណាយលើសំាងច្រើនពេកក៏អត់មានលទ្ធភាពសម្រាប់ផ្គត់ផ្គង់ខ្លួនឯងដែរ និងគ្រួសារដែរ ៣០០០ជាងបានហើយ ៣២០០ទៅ៣៣០០រៀល»។
អ្នកគ្រប់គ្រងនៅក្រុមហ៊ុនស្ថានីយប្រេងឥន្ធនៈ ភីធីធី(PTT) ជាក្រុមហ៊ុនមួយក្នុងចំណោមក្រុមហ៊ុនប្រេងឥន្ធនៈផ្សេងទៀត លោក សាយ កុសល បានឲ្យដឹងថា ប្រេងសំាងឡើងថ្លៃនេះ ដោយសារប្រេងនៅអន្តរជាតិឡើងថ្លៃ ខណៈកម្ពុជានាំប្រេងចូលពីអន្តរជាតិ។
យ៉ាងណាក៏ដោយលោក សាយ កុសល អះអាងថា ក្រុមហ៊ុនលោកមិនមែនឡើងថ្លៃប្រេងសំាងតាមតែការនឹកឃើញនោះទេ ដោយថាការតំឡើងតម្លៃធ្វើតាមការកំណត់របស់ក្រសួង រ៉ែ និងថាមពល។ លោកលើកឡើងថា៖ «មើលតាមវេបសាយរបស់ក្រសួង[ក្រសួងរ៉ែ និងថាមពល] យើងអនុវត្តទំាងអស់គ្នា គ្រប់ស្ថានីយទំាងអស់ មិនមែនតែខាងខ្ញុំទេ»។
អ្នកនាំពាក្យក្រសួងរ៉ែ និងថាមពល លោក ឌិត ទីណា មានប្រសាសន៍ថា ការឡើងថ្លៃប្រេងសំាងនេះ លោកថា ដោយសារចរន្តទីផ្សារអន្តរជាតិ មានការប្រែប្រួល។ យ៉ាងណាក៏ដោយលោកថា ភាគីពាក់ព័ន្ធជាអ្នកកំណត់តម្លៃជារៀងរាល់១០ថ្ងៃម្តង ឲ្យក្រុមហ៊ុន លក់ តាមការកណតនោះ។ លោកបញ្ជាក់ថា៖ «សូមកុំយកបញ្ហានេះ យកមកបង្វិលថា ក្រសួងជាអ្នកតំឡើងថ្លៃ ឬបញ្ចុះតម្លៃ យើងមិនមែនជាអ្នកតំឡើងជាអ្នកបញ្ចុះទេ យើងជាអ្នកគណនានៅតម្លៃដំបូង ដែលមិនអាចឲ្យគាត់លក់លើសនេះបាន បើគាត់(ម្ចាស់ក្រុមហ៊ុន)ចង់ប្រកួតប្រជែងគ្នា គាត់ចង់លក់ចុះក្រោមនេះបាន[លក់ក្រោមតម្លៃក្រសួងកំណត់] ប៉ុន្តែគាត់លក់លើស គឺមិនបានទេ ដោយសារតែយើងយកតាមតម្លៃទីផ្សារអន្តរជាតិ»។
បើតាម លោក ឌិត ទីណា បើក្រុមហ៊ុនប្រេងណាមិនគោរពតាមការណែនាំ នោះក្រសួងនឹងធ្វើការផាកពិន័យក្នុងមួយថ្ងៃ៤លានរៀល។
យោងតាមតម្លៃប្រេងសាំងនៅតាមស្ថានីយប្រេងឥន្ធនៈមួយចំនួនក្នុងរាជធានីភ្នំពេញ បច្ចុប្បន្នតម្លៃប្រេងសាំងធម្មតា៣៧៥០រៀល ក្នុងមួយលីត្រ ប្រេងសាំងស៊ុបពែ៣៨០០រៀលក្នុងមួយលីត្រ និងប្រេងម៉ាស៊ូត៣៤០០រៀលក្នុងមួយលីត្រ ប៉ុន្តែកាលពីមុនតម្លៃប្រេងឥន្ធនៈប្រហែល៣១០០ទៅ៣៣០០រៀល៕
