សាលាដំបូងរាជធានីភ្នំពេញ បានចេញដីកាកោះហៅអតីតប្រធានសហជីពសេរីកម្មករ លោក ជា មុនី ឲ្យចូលទៅបំភ្លឺជាលើកទី២នៅតុលាការជុំវិញសំណុំរឿងដែលសហជីពក្រុមផ្សេងទៀតបានប្តឹងពីបទញុះញង់។
កាលពីចុងឆ្នាំ២០១៧ លោកមេធាវី ដារ៉ា សុបញ្ញា និងលោក កេតុ សុណ្ណឌី ដែលអះអាងថា តំណាងឲ្យសហជីពចំនួន១២០ស្ថាប័ន បានប្តឹងលោក ជា មុនី ដោយចោទថា បានញុះញង់ឱ្យសហភាពអឺរ៉ុប និងសហរដ្ឋអាមេរិកដាក់ទណ្ឌកម្មសេដ្ឋកិច្ចលើកម្ពុជា។
កាលពីថ្ងៃទី១៩ ខែធ្នូ តុលាការបានកោះហៅឲ្យចូលបំភ្លឺម្តងរួមមកហើយគឺកំណត់ឲ្យចូលបំភ្លឺនៅថ្ងៃទី២២ខែមករា ប៉ុន្តែ លោក ជា មុនី មិនបានចូលតាមការបង្គាប់ឡើយ។
ក្នុងដីកាកោះចុះថ្ងៃទី២៣មករាឆ្នាំ២០១៨ តំណាងអយ្យការអមសាលាដំបូងរាជធានីភ្នំពេញ លោក សៀង សុខ បានកោះហៅ លោក ជា មុនី ឲ្យចូលបំភ្លឺជាលើកទី២ក្នុងនាមជនសង្ស័យនៅព្រឹកថ្ងៃទី៩ ខែកុម្ភៈវេលាម៉ោង៩ព្រឹក។
វិអូឌីមិនសុំការឆ្លើយបំភ្លឺពីលោក ជា មុនី បានទេជុំវិញការកោះហៅឲ្យចៅលបំភ្លឺជាលើកទី២នេះ ដោយទូរសព្ទហៅចូលគ្មានអ្នក ទទួល។
លោក ជា មុនី ត្រូវបានក្រុមសហជីព ដែលគេមើលឃើញថា មានទំនោរគាំទ្ររដ្ឋាភិបាលប្តឹង ដោយចោទពីបទញុះញង់ បន្ទាប់ពីលោកបានធ្វើបទសម្ភាសន៍មួយជាមួយវិទ្យុអាស៊ីសេរីកាលពីចុងឆ្នាំ២០១៧ ដែលសហជីពទាំងនោះថា បានអំពាវនាវឲ្យ សហភាពអឺរ៉ុប និងសហរដ្ឋអាមេរិកដាក់ទណ្ឌកម្មលើរដ្ឋាភិបាលកម្ពុជាក្រោយរំលាយបក្សប្រឆាំង។
អតីតប្រធានសហជីពសេរីកម្មកររូបនេះ មិនបានចូលរួមគោរពវិញ្ញាណក្ខន្ធ និងដាក់កម្រងផ្កានៅថ្ងៃរំឭកខួប នៃការបាញ់សម្លាប់ បងប្រុសរបស់គាត់ គឺលោក ជា វិជ្ជា ទេ កាលពីថ្ងៃទី២២មករានេះ ដោយសារតែរងបណ្តឹងនៅតុលាការ៕
