គម្រោងរោងចក្រកាន់តែប្រសើរនៅកម្ពុជា (BFC) បានបង្ហាញរបាយការណ៍ប្រចាំឆ្នាំ រកឃើញថា កម្មករក្នុងវិស័យកាត់ដេរ នៅតែ ប្រឈមនឹងបញ្ហាសុវត្ថិភាព បញ្ហាសុខភាព ក្នុងលក្ខខណ្ឌការងារ បើទោះបីជាការរំលោភបំពានមានការថយចុះក៏ដោយ ។
តាមរបាយការណ៍ បញ្ហាចំបងៗទំាង២១ទាក់ទិននឹងច្បាប់ការងារ ដែលគម្រោងរោងចក្រកាន់តែប្រសើរនៅកម្ពុជា បានចុះស្រាវជ្រាវរយៈពេល១ឆ្នាំមកនេះ រកឃើញថា ការប្រើកម្លាំងពលកម្មកុមារបានធ្លាក់ចុះពី៧៤ករណី មកត្រឹម៤ករណី និងថាការរំលោភបំពានបានថយចុះពី២៨១ មក១៩៧ ពោលគឺធ្លាក់ចុះ៨៤ករណី។
បើតាមរបាយការណ៍ បញ្ហាចំបងៗចំនួន២១នោះ មានការបើកប្រាក់ឈ្នួលមិនគ្រប់ បង្ខំឲ្យកម្មករថែមម៉ោង មិនឲ្យច្បាប់ឈប់ពេលឈឺ ឬសម្រាកពេលសម្រាលកូន រើសអើងសហជីព និងការប្រើកម្លាំងកុមារជាដើម។
របាយការណ៍បង្ហាញទៀតថា ភាពរីកចម្រើនមួយទៀតគួឲ្យកត់សម្គាល់ក្នុងវិស័យកាត់ដេរ គឺការបណ្តុះបណ្តាលកម្មករ និយោជិតក្នុងការជម្លៀសបន្ទាន់ កើនឡើង១៧% ការបើកច្រកទ្វារចេញ មិនចាក់សោទ្វារក្នុងម៉ោងធ្វើការ កើនឡើង១៣% ដែល គម្រោងរោងចក្រកាន់តែប្រសើរ ចាត់ទុកថាបញ្ហាទាំងពីរនេះមានសារៈសំខាន់ ក្នុងការបង្កើនសុវត្ថិភាពដល់កម្មករ និយោជិតក្នុងករណីសង្គ្រោះបន្ទាន់។
ប៉ុន្តែ គម្រោងរោងចក្រកាន់តែប្រសើរ បានរកឃើញដែរថា បញ្ហាផ្សេងៗទៀតនៅជុំវិញសុវត្ថិភាព និងសុខភាពការងារ នៅតែជាបញ្ហាប្រឈមក្នុងវិស័យនេះ។ របាយការណ៍បញ្ជាក់ថា «លទ្ធផលទាំងនេះ ដែលរោងចក្រមិនអាចធ្វើបាន ឬមិនចង់ធ្វើ ដោយត្រូវចំណាយច្រើនទៅលើធនធាន ដូចជាប្រើប្រាស់ឧបការណ៍ភ្លើងបំភ្លឺ ប្រព័ន្ធខ្យល់ចេញចូល ជាដើម ហើយបញ្ហាមួយទៀតដោយសាររោងចក្រទាំងនោះ មិនទាន់មាននិតិវិធី និងគោលការរណ៍ច្បាស់លាស់»។
បើតាមរបាយការណ៍ ការចុះស្រាវជ្រាវប្រមូលទិន្ន័យនេះ ធ្វើឡើងចាប់ពីថ្ងៃទី១ឧសភាឆ្នាំ២០១៦ ដល់ថ្ងៃទី៣០មេសាឆ្នាំ២០១៧ លើរោចក្រជិត៤០០(៣៩៥)។
ប្រធានសហភាពការងារកម្ពុជាលោក អាត់ ធន់ និយាយថា របាយការណ៍នេះមិនបានឆ្លុះបញ្ចាំងការពិតដល់កម្មករធ្វើការនៅក្នុងរោងចក្រទូទាំងប្រទេសទេ ដោយថា នៅកម្ពុជាមានរោងចក្រជាង១០០០ ចំណែកឯការចុះប្រមូលទិន្ន័យ របស់គម្រោងរោចក្រកាន់តែប្រសើរ បានផ្តោតលើតែទៅលើ៤០០រោងចក្រប៉ុណ្ណោះ។
លោកថា៖ «វាមានការប្រសើរខ្លះ ចំពោះរោងចក្រដែលបានចុះត្រួតពិនិត្យ។ ប៉ុន្តែចំពោះសេរីភាពសហជីព វានៅតែជាបញ្ហាទេព្រោះយើងមើលទៅតាំងពីច្បាប់សហជីពកើតឡើងមក សេរីភាពសហជីព វាកាន់តែរឹតបណ្តឹងលក្ខខណ្ឌស្មុកស្មាញ ដែលធ្វើឲ្យកម្មករហ្នឹងគាត់មានការលំបាកធ្វើការតវ៉ា ឬរកតំណាងដើម្បីជួយដោះស្រាយគាត់»។
ក្រសួងការងារបានឲ្យដឹងថា កម្មករដែលកំពុងបម្រើការងារក្នុងវិស័យកាត់ដេរទូទាំងប្រទេសមានចន្លោះពី៧០ម៉ឺនទៅ៨០ម៉ឺននាក់។
យ៉ាងណាក៏ដោយរបាយការណ៍បានដកស្រង់សម្តីប្រធានគម្រោងរោងចក្រកាន់តែប្រសើរ លោក ស្រី អិស្តើរ ហើមិនស៍ មកចុះផ្សាយថា នឹងបន្តខិតខំប្រឹងប្រែងការងាររបស់ខ្លួន ជាមួយរាជរដ្ឋាភិបាល សមាគមរោងចក្រកាត់ដេរនៅកម្ពុជានិងសហជីពដើម្បីធ្វើឲ្យលក្ខខណ្ឌការងារកាន់តែប្រសើសម្រាប់កម្មករនិយជិតនៅកម្ពុជា ក៏ដូចជាបង្កើតនូវសក្តានុពលសម្រាប់វិស័យកាត់ដេរនៅកម្ពុជា៕
