រដ្ឋាភិបាលបានដំឡើងឋានន្តរសក្ដិដល់មន្ត្រីនគរបាលជាតិចំនួន៦រូបពីថ្នាក់ឧត្ដមសេនីយ៍ឯក(ផ្កាយ៣)ទៅជានាយឧត្ដមសេនីយ៍(ផ្កាយ៤) ក្នុងនោះក៏មានលោក ជួន សុវណ្ណ ស្នងការនគរបាលរាជធានីភ្នំពេញផងដែរ។ ប៉ុន្តែមន្រ្តីសង្គមស៊ីវិលបានរិះគន់ចំពោះការបំពាក់ផ្កាយបន្ថែមដល់លោក ជួន សុវណ្ណ។
នាយកប្រតិបត្តិសមាគមធាងត្នោត (STT) លោក អ៊ី សារុំ កត់សម្គាល់ថាក្រោយការបោះឆ្នោតឆ្នាំ២០១៣ លោក ជួន សុវណ្ណ ជាមនុស្សលេចធ្លោជាងគេជាប់ពាក់ព័ន្ធនឹងការបញ្ជាឲ្យបង្ក្រាបដោយហិង្សាទៅលើក្រុមបាតុករតវ៉ាទាមទារដីធ្លីនិងជម្រកសមរម្យ។ លោកយល់ថាស្នងការនគរបាលរូបនេះមិនបានជួយបម្រើប្រយោជន៍ប្រជាពលរដ្ឋបានច្រើននោះទេ។
លោកមានប្រសាសន៍ថា៖ “តួនាទីរបស់លោក ជួន សុវណ្ណ កន្លងមកនេះហាក់ដូចជាមិនបានបង្ហាញពីការគោរពសិទ្ធិមនុស្ស ការគោរពច្បាប់ ក៏ដូចជាការបម្រើពីផលប្រយោជន៍ប្រជារាស្ត្រ ប៉ុន្តែផ្ទុយទៅវិញគាត់ប្រើអំពើហិង្សាមកលើប្រជាពលរដ្ឋដែលលោកតវ៉ាដើម្បីយុត្តិធម៌ ដើម្បីទាមទារនូវអ្វីដែលខ្លួនបាត់បង់ទៅ” ។
នាយកប្រតិបត្តិសមាគមធាងត្នោតបានប្រៀបធៀបលោក ជួន សុវណ្ណ ទៅនឹងអតីតស្នងការនគរបាលរាជធានីភ្នំពេញទៅ លោក ហេង ពៅ និងលោក ទូច ណារ៉ុថ។ ប៉ុន្តែលោកថាក្នុងចំណោមនោះគឺលោក ទូច ណារ៉ុថ បានបើកចិត្តទូលាយជាងគេក្នុងការជួបសង្គមស៊ីវិលស្តាប់មតិ ប៉ុន្តែលោកថារាល់ការសម្រេចកិច្ចការអ្វីគឺត្រូវឆ្លងកាត់ថ្នាក់លើជាអ្នកសម្រេចដដែល។
ប្រធានលេខាធិការដ្ឋាននៃក្រុមការងារពិសេសសិទ្ធិលំនៅឋានលោក សៀ ភារម្យ យល់ឃើញប្រហាក់ប្រហែលនឹងលោក សារុំ ដែរ។ ប៉ុន្តែលោកបន្ថែមថាក្នុងពេលលោក ជួន សុវណ្ណ កាន់តំណែងស្នងការនគរបាលរាជធានីភ្នំពេញ បទល្មើសឆក់ ប្លន់ នៅតែបន្តកើតឡើងច្រើន។ លោកយល់ថាបើទោះជាដំឡើងឋានន្តរសក្ដិឬតែងតាំងស្នងការនគរបាលថ្មីក៏ដោយក៏មិនអាចជួយឲ្យប្រជាពលរដ្ឋរងគ្រោះដីធ្លីនិងអ្នករងគ្រោះបញ្ហាផ្សេងៗទទួលបានភាពយុត្តិធម៌នោះទេ។
លោកបញ្ជាក់ថា៖ “បើសិនជាយើងអាចផ្លាស់ប្តូរប្រព័ន្ធហ្នឹងបានប្រហែលជាមានអ្នកផ្សេងដែលគាត់ចង់ធ្វើល្អដែរតាមការពិតបុគ្គលទំាងអស់ហ្នឹងគាត់មានក្រុមគ្រួសារមានបងប្អូនគេមិនចូលចិត្តដែរ ប៉ុន្តែធ្វើម៉េចបើគាត់នៅក្នុងប្រព័ន្ធហ្នឹងហើយ បើគាត់មិនធ្វើតាមប្រព័ន្ធហ្នឹងទេ គឺថាគាត់ត្រូវបាត់ផលប្រយោជន៍ បាត់បង់មុខតំណែង បាត់បង់អីទៅ គាត់ត្រូវតែទ្រំាធ្វើដើម្បីផលប្រយោជន៍ដើម្បីលាភសក្ការៈដែរ”។
អនុប្រធានផ្នែកសិទ្ធិមនុស្សរបស់សមាគមការពារសិទ្ធិមនុស្សអាដហុកលោក ណៃ វ៉ង់ដា មើលឃើញពីចំណុចវិជ្ជមាននិងចំណុចអវិជ្ជមានរបស់ស្នងការនគរបាលរូបនេះ។ លោកកត់សម្គាល់ថា៖”កន្លែងខ្លះជាការអនុវត្តមួយល្អប្រសើរដែរដូចជាករណីការអនុវត្តរបស់សមត្ថកិច្ចប៉ូលិសនៅក្រុងភ្នំពេញយើងពាក់ព័ន្ធទៅនឹងបញ្ហាគ្រឿងស្រវឹង ការពិនិត្យគ្រឿងស្រវឹង ហើយការរឹតបន្តឹងនូវច្បាប់ចរាចរណ៍ថ្មី យើងឃើញថាមានការអនុវត្តល្អគួរសមដែរ ប៉ុន្តែទាក់ទងទៅនឹងការប្រើប្រាស់កម្លាំងក្នុងការបង្ក្រាបបាតុកម្ម ក្នុងការដោះស្រាយជាមួយបាតុករ យើងឃើញថាអត់មានការល្អទេ”។
VODមិនទាន់សុំការឆ្លើយតបពីលោក ជួន សុវណ្ណ បានទេ។ ប៉ុន្តែរដ្ឋមន្ត្រីក្រសួងមហាផ្ទៃលោក ស ខេង បានថ្លែងប្រាប់អ្នកព័ត៌មានពេលចេញពីសន្និបាតបូកសរុបការងារក្រសួងមហាផ្ទៃកាលពីថ្ងៃទី២៣ ខែកុម្ភៈថាលោកសុំឲ្យសង្គមស៊ីវិលកុំមើលតែមួយជ្រុងតូចដោយលោកថាការដំឡើងតំណែងតួនាទីនិងឋានន្តរស័ក្តិដល់លោក ជួន សុវណ្ណ ដោយសារមន្ត្រីរូបនោះបានបម្រើជាតិស្ទើរតែពាក់កណ្តាលជីវិតទៅហើយ។
ក្រោយការបោះឆ្នោតឆ្នំា២០១៣មន្រ្តីសង្គមស៊ីវិលកត់សំគាល់ថាលោក ជួន សុវណ្ណ ជាមនុស្សលេចធ្លោជាងគេជាប់ពាក់ព័ន្ធនឹងការបញ្ជាឲ្យបង្ក្រាបដោយហិង្សាលើអ្នកតវ៉ាដីធ្លីនៅមុខសាលារាជធានីនិងការបង្រ្កាបនៅម្តុំស្ពានអាកាសក្បាលថ្នល់ស្ពានស្ទឹងមានជ័យនិងការបង្រ្កាបអ្នកតវ៉ានៅលើផ្លូវវ៉េងស្រេងដែលបានបណ្ដាលឲ្យមានមនុស្សស្លាប់៥នាក់និងរបួសជិត៤០នាក់។
លោកឧត្តមសេនីយ៍ ជួន សុវណ្ណ ជាអគ្គស្នងការរងនគរបាលជាតិត្រូវបានរដ្ឋាភិបាលបន្ថែមតួនាទីមួយទៀតកាលពីចុងឆ្នាំ២០១២ជាស្នងការនគរបាលរាជធានីភ្នំពេញជំនួសលោក ទូច ណារ៉ុថ ដែលត្រូវផ្ទេរទៅជាប្រធាននាយកដ្ឋានអង្គរក្ស៕