មន្រ្តីឃ្លាំមើលការបោះឆ្នោត បង្ហើបឲ្យដឹងថា ការស្ទង់មតិមួយរកឃើញថា គណបក្សប្រឆាំងនៅកម្ពុជានឹងឈ្នះយ៉ាងហោចណាស់៦០% នៃសំឡេងឆ្នោតសរុបនៅក្នុងការបោះឆ្នោតខាងមុខនេះ។
មន្រ្តីច្បាប់និងអង្កេតនៃអង្គការឃ្លាំមើលការបោះឆ្នោតដែលមិនឲ្យប្រាប់ស្ថាប័ន លោក យឿង សុធារ៉ា បានបញ្ចេញជាទស្សនៈផ្ទាល់ខ្លួនដោយសរសេរនៅលើហ្វេសប៊ុករបស់លោកដែលបានបញ្ជាក់ជាផ្លូវការជាមួយ VOD ថា «ខ្ញុំលឺគេថា មានការសិក្សាស្ទង់មតិរបស់អង្គការបរទេសមួយរកឃើញថា គណបក្សប្រឆាំងនឹងអាចឈ្នះអាសនៈ យ៉ាងហោចណាស់ ៦០ភាគរយ។ ការសិក្សានេះធ្វើទៅលើឃុំប្រហែល១ពាន់ឃុំនៅតាមខេត្ត»។
លោក យឿង សុធារ៉ា មិនបានបញ្ចេញឈ្មោះស្ថាប័នដែលធ្វើការស្ទង់មតិនេះទេ។ ប៉ុន្តែលោកយល់ថា «លទ្ធផលនេះប្រហែលអាចប្រែក្លាយជាការពិត ប្រសិនបើសាមគ្គីភាពផ្ទៃក្នុងរបស់របស់គណបក្សប្រឆាំងដ៏ធំនេះ នៅតែរក្សាភាពរឹងមាំរបស់ខ្លួនដដែល»។
លោក កឹម សុខា ដែលទើបឡើងធ្វើជាប្រធានគណបក្សសង្រ្គោះជាតិ កាលពីពេលថ្មីនេះ បានថ្លែងនៅចំពោះមុខសមាជិកក្រុមប្រឹក្សាឃុំ សង្កាត់របស់ខ្លួនថា មានគេថាគណបក្សសង្រ្គោះជាតិឈ្នះបាន៦០% តែជាក់ស្តែង «ក្រែងលោ៧០% ទៅ៨០%ទៅ?» ព្រោះមានមេរៀនស្រាប់កាលពីឆ្នាំ២០១៣៕