ទីភ្នាក់ងារព័ត៌មានអន្តរជាតិ AFP បានផ្សាយថា មនុស្សប្រហែល ១០០នាក់ ត្រូវបានគេបារម្ភថា កប់នៅក្រោមដី បន្ទាប់ពីដីរអិលបាក់ និងបានវាយប្រហារលើភូមិរបស់ពួកគេ ស្ថិតនៅខេត្តស៊ីឈួន ភាគពាយព្យប្រទេសចិន នៅព្រឹកថ្ងៃនេះ ខណៈដែលអាជ្ញាធរចិនកំពុងតែចាប់ផ្ដើមប្រតិបត្តិការជួយសង្គ្រោះ។
អាជ្ញាធរចិន បានប្រាប់ទៅសារព័ត៌មានអន្តរជាតិថា ផ្ទះសម្បែងប្រហែល ៤០គ្រួសារនៅភូមិស៊ិនម៉ូ ត្រូវបានដីរអិលធ្លាក់ពីភ្នំសង្កត់លើ និងបានបិទទឹកស្ទឹងប្រវែង ២គីឡូម៉ែត្រ។
អាជ្ញាធរចិនប្រកាសថា ប្រតិបត្តិការសង្គ្រោះបន្ទាន់ចំពោះគ្រោះមហន្តរាយធម្មជាតិនេះ កំពុងដំណើរការទៅ ដោយថា ទំហំនៃដីរអិលបាក់នោះ គេនៅមិនទាន់ដឹងច្បាស់នៅឡើយទេ។
ដីរអិលបាក់ តែងតែបង្កជាគ្រោះថ្នាក់ជាញឹកញយនៅតំបន់ភ្នំជនបទនៅក្នុងប្រទេសចិន ជាពិសេសពេលមានភ្លៀងធ្លាក់ជោគជាំ។
យ៉ាងហោចណាស់មនុស្ស ១២នាក់ ត្រូវបានសម្លាប់នៅក្នុងខែមករា នៅពេលដីរអិលបាក់សង្កត់លើសណ្ឋាគារមួយ នៅភាគកណ្ដាលខេត្តហឺប៉ី៕