មេដឹកនាំនយោបាយអាល្លឺម៉ង់ លើកឡើងថា សហគមន៍អឺរ៉ុប ត្រូវតែខ្លាំងជាងមុន ដើម្បីឆ្លើយតបទៅនឹងការធ្លាក់ចុះនៃលទ្ធិប្រជាធិបតេយ្យនៅអាមេរិក រុស្ស៊ី និងតួកគី។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
Reuters បានផ្សាយដូច្នេះ ដោយបានដកស្រង់សម្ដីលោក Martin Schulz អតីតប្រធានសភាអឺរ៉ុប ហើយបច្ចុប្បន្ននេះជាមេដឹកនាំបក្សប្រជាធិបតេយ្យសង្គម។ លោក Martin បានលើកឡើងដូច្នេះនៅសុន្ទរកថារបស់លោក ដែលផ្សាយនៅថ្ងៃនេះ។
លោកលើកឡើងថា ប្រធានាធិបតីអាមេរិក ដូណាល់ ត្រាំ ប្រធានាធិបតីរុស្ស៊ី វ៉្លាឌីមៀ ពូទីន និងប្រធានាធិបតីតួកគី លោក តាយីប អឺដូហ្គេន បានធ្វើខ្លួនដូច “មេដឹកនាំផ្ដាច់ការ”។
អធិការបតីអាល្លឺម៉ង់ អ្នកស្រី អ៊ែនជឺឡា មឺកែល គ្រោងនឹងទទួលស្វាគមន៍មេដឹកនាំនៃបណ្ដាប្រទេសមានសេដ្ឋកិច្ចធំទាំង ២០ ឬហៅកាត់ថា G20 នៅឯទីក្រុងហាំប៊ឺក នៅថ្ងៃទី៧ ដល់ទី៨ ខែកក្កដាខាងមុខ ដែលនៅពេលនោះ លោក ត្រាំ បានប្ដេជ្ញាចរចាកិច្ចព្រមព្រៀងពាណិជ្ជកម្មឡើងវិញ៕
