សេចក្ដីរាយការណ៍ពីទីភ្នាក់ងារព័ត៌មានអន្តរជាតិ បានឲ្យដឹងថា ពលរដ្ឋឥណ្ឌូនេស៊ីជាង ៣ម៉ឺន ៤ពាន់នាក់ បានភៀសចេញពីតំបន់ភ្នំភ្លើងនៅលើកោះបាលី ខណៈដែលកម្រិតញ័ររញ្ជួយកាន់តែខ្លាំងឡើង ដែលបង្កឲ្យមានក្ដីបារម្ភថា វាអាចនឹងផ្ទុះជាលើកដំបូងនៅក្នុងរយៈពេលជាង ៥០ឆ្នាំមកនេះ។
ដោយបានដកស្រង់ព័ត៌មានរបស់ទីភ្នាក់ងារបញ្ចៀសមហន្តរាយឥណ្ឌូនេស៊ី ទីភ្នាក់ងារព័ត៌មាន AFP បានចុះផ្សាយថា ចំនួនមនុស្សដែលគេចចេញពីផ្ទះសម្បែងរបស់ពួកគេនៅជុំវិញភ្នំភ្លើងនោះ បានកើនឡើង ៣ដង ចាប់តាំងពីថ្ងៃសុក្រកន្លងមក ចំពេលមានការព្រមានកាន់តែខ្លាំងថា ភ្នំ Agung អាចនឹងផ្ទុះនៅពេលណាមួយ។
អ្នកនាំពាក្យទីភ្នាក់ងារបញ្ចៀសមហន្តរាយឥណ្ឌូនេស៊ី លោក Sutopo Purwo Nogroho ត្រង់បានដកស្រង់សម្ដីដែលនិយាយថា ដំណើរការជម្លៀសប្រជាជនកំពុងប្រព្រឹត្តទៅ ហើយគេរំពឹងថា ចំនួនជនភៀសខ្លួននឹងបន្តកើនឡើង។
ភ្នំភ្លើងនេះ ដែលស្ថិតនៅចម្ងាយប្រហែល ៧៥គីឡូម៉ែត្រពីមណ្ឌលទេសចរណ៍ Kuta នោះ បានកំរើកចាប់តាំងពីខែសីហាមកម៉្លេះ។
ក្រុមមន្ត្រីប្រកាសថា ការព្រមានក្នុងកម្រិតខ្ពស់បំផុតកាលពីយប់ថ្ងៃសុក្រនោះ បានកើតឡើងក្រោយពីភ្នំភ្លើងនោះកំរើកកាន់តែខ្លាំង ហើយអាជ្ញាធរបានជំរុញទៅប្រជាជនឲ្យស្ថិតក្នុងចម្ងាយយ៉ាងតិច ៩គីឡូម៉ែត្រពីភ្នំភ្លើងនោះ៕
