រដ្ឋមន្ត្រីក្រសួងព័ត៌មានបានថ្លែងដោយសំដៅដល់វិទ្យុអាចារ្យអេថា ពិធីការិនីដែលប្រើពាក្យប្រមាថសាធារណជននោះត្រូវបានកត់ចូលក្នុងបញ្ជីខ្មៅហើយ។
ការថ្លែងរបស់ លោក ខៀវ កាញារីទ្ធ គឺជាការឆ្លើយតបនឹងសំណួរអ្នកសារព័ត៌មាននៅព្រឹកថ្ងៃពុធនេះ នៅក្រៅកិច្ចប្រជុំមួយរវាងម្ចាស់ស្ថានីយ៍ទូរទស្សន៍និងក្រសួងព័ត៌មាន។ លោកថា៖ «…ពីធីករ ពិធីការិនីណាដែលជាប់ជំពាក់លើបញ្ហាជេរបញ្ចោរត[តបទៅវិញ]គេចឹងហើយ គឺមិនអនុញ្ញាតឲ្យបានទេ លើកលែងតែបីបួនឆ្នាំទៀតម៉េចមិនដឹងទេ។ ប៉ុន្តែគាត់បានចូលក្នុងបញ្ជីខ្មៅរបៀបហ្នឹងហើយ គឺគាត់មិនអាចទៅ លើកលែងតែខំកសាងខ្លួនឡើងវិញទើបបាន។ ប៉ុន្តែក្នុងពេលនេះ បើចឹងទេ គ្រាន់តែជេរបញ្ចោរអ្នកណាជេរទៅ ចាំសុំទោសមួយម៉ាត់ពីរចប់ អាហ្នឹងអត់បានទេ…»។
បើតាមលោករដ្ឋមន្រ្តី ករណីពិធីការនី លោតរំលងតុពេលកំពុងផ្សាយផ្ទាល់គឺជាកំហុសឆ្គងមួយហើយ តែអ្វីដែលក្រសួងមិនអាចអន់ឱនឲ្យបាននោះ គឺការដែលពិធីការនីមួយចំនួនរបស់វិទ្យុអាចារ្យអេ បានជេរដៀលទៅកាន់ការរិះគន់ទៅវិញ។
លោកមានប្រសាសន៍ថា៖ «…ជាកំហុសមួយដែលយើងមិនអាចទទួលបាន គឺនៅពេលដែលមានការរិះគន់ហើយ គាត់ត្រូវឆ្លើយបំភ្លឺ គាត់ត្រូវពន្យល់ ប៉ុន្តែរបៀបឆ្លើយរបស់គាត់គឺការជេរ បង្អាប់ ដៀលគេមកវិញ។ នេះមិនមែនជាវិជ្ជាជីវៈរបស់ពីធីករ ពិធីការិនីទេ…»។
កាលពីម្សិលមិញក្រសួងព័ត៌មាន បានបញ្ជាឲ្យបញ្ឈប់ជាបន្ទាន់ កិច្ចសហការផលិតកម្មវិធីផ្សាយរវាង ទូរទស្សន៍ប៉ុស្តិ៍លេខ៣ ជាមួយវិទ្យុអាចារ្យអេ ABC កម្ពុជា FM 107.5 បន្ទាប់ពីមានការរិះគន់ និងការឆ្លើយឆ្លង រវាងពិធីការិនីកម្មវិធី ABC 3 Spring ទៅកាន់មហាជនដែលរិះគន់គន់ចំពោះឥរិយាបថរបស់ពិធីការនីមួយចំនួននោះ៕