ប្រជាពលរដ្ឋចំនួន ៩គ្រួសារ ដែលសង់ផ្ទះនៅលើផ្លូវសាធារណៈនៅម្តុំសង្កាត់ផ្សារដើមថ្កូវ បានឲ្យដឹងថា ពួកគេព្រួយបារម្ភពីសុវត្ថិភាព ខណៈរថយន្ត និងម៉ូតូបើកឆ្លងកាត់ក្បែរផ្ទះស្ទើរតែ ២៤ម៉ោង ជារៀងរាល់ថ្ងៃ។
ដោយប្រាប់ថា ប្រកបមុខរបររើសអេតចាយ ស្ត្រីម្នាក់ដែលសុំមិនបញ្ចេញឈ្មោះ បានឲ្យដឹងថា គាត់បានជួលផ្ទះលើផ្លូវសាធារណៈ ស្ថិតនៅលើផ្លូវលេខ៩៧ ក្នុងសង្កាត់ផ្សារដើមថ្កូវនោះអស់រយៈពេលជាង ១០ឆ្នាំមកហើយ ដោយថា ក្នុងមួយខែបង់ ៥ម៉ឺនរៀល ប៉ុន្តែថា គាត់មិនដែលឃើញអាជ្ញាធរមកសួរនាំអ្វីនោះទេ។ ស្រ្តីដដែលនេះ បានបន្ថែមថា គាត់មិនចង់រស់នៅលើផ្លូវសាធារណៈនោះទេ ប៉ុន្តែ គាត់ថា មិនមានជម្រើស ខណៈមានជីវភាពក្រីក្រ។
អ្នកស្រីនិយាយថា៖ «ព្រួយដែរយប់ព្រលប់ ខ្លាចអ្នកស្រវឹង ជិះឡានមកបុក ព្រោះអីផ្ទះនេះបុកម្តង ផ្ទះនោះក៏បុកម្តងដែរ ហើយដេកយប់ ព្រលប់ខ្លាច មិនដឹងអ្នកស្អប់ អ្នកណាខ្ពើមដុតទៅចប់ហើយ ព្រោះអីផ្ទះតាមផ្លូវ ហើយសុទ្ធតែផ្ទះឈើ តែយើងអត់មានជម្រើស បើយើងអត់មានលុយ ចេះតែនៅទៅ បើផ្ទះថ្មមួយខែ៧០ ទៅ ៨០ដុល្លារ យើងមានលទ្ធភាពឯណា»។
អ្នកស្រី គឹម រ៉ាវី ដែលអះអាងថា ជាជនជាតិខ្មែរកម្ពុជាក្រោម បានឲ្យដឹងដែរថា គាត់មកសង់ផ្ទះនៅលើផ្លូវលេខ៩៧ ស្ថិតនៅសង្កាត់ផ្សារដើមថ្កូវ រយៈពេល ៣៦ឆ្នាំមកហើយ ពុំមានអាជ្ញាធរមករករឿងអ្វីនោះទេ ដោយថា គ្រាន់តែចៅសង្កាត់ហៅទៅណែនាំថា សំណង់នេះមិនស្របតាមច្បាប់នោះទេ។ អ្នកស្រីបន្តថា បើថ្ងៃណាមួយអាជ្ញាធរបញ្ជាឲ្យគាត់រុះរើចេញពីកន្លែងនោះ អ្នកស្រីថា នឹងធ្វើតាម ប៉ុន្តែ ត្រូវផ្តល់សំណងសមរម្យ។
អ្នកស្រីនិយាយថា៖ «បើសិនគេថា ឲ្យមានថិវិកា បានទិញផ្ទះគ្រប់ ចេះតែចង់ទៅដែរ គ្មានអ្នកណាគាត់ចង់នៅកណ្តាលថ្នល់ទេ…និយាយត្រង់…អ្នកណាចង់នៅ បើផ្ទះតូច ពិបាកនៅដែរ បើយើងគ្មានថវិកា»។
ចៅសង្កាត់ផ្សារដើមថ្កូវ លោក ហែម សុផាត បានប្រាប់ថា លោកបានដឹងអំពីសំណង់លំនៅឋាននៅលើផ្លូវសាធារណៈនោះ ប៉ុន្តែ លោកថា លោកមិនអាចដោះស្រាយករណីនេះបានទេ។ លោកបញ្ជាក់ថា ករណីនេះអាចដោះស្រាយបាន លុះត្រាតែមានបញ្ជាពីថ្នាក់លើ។
លោក ហែម សុផាត ប្រាប់ថា៖ «គេមកយូរហើយ ក៏ប៉ុន្តែបើសិនណាជាសាលាក្រុង មានគោលការនៅតំបន់អភិវឌ្ឍណា យើងនិងសុំគេធ្វើការផ្លាស់ប្តូរដែរ យើងឃើញហើយ មិនមែនថា យើងមិនទើសទេ យើងទើស ក៏ប៉ុន្តែបើនិយាយត្រឹមលទ្ធភាពសង្កត់ គឺយើងមិនអាចដោះស្រាយបានទេ»។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានឲ្យដឹងថា លោកមិនទាន់ទទួលបានព័ត៌មាននេះពីអាជ្ញាធរមូលដ្ឋាននៅឡើយទេ ប៉ុន្តែ លោកថា លោកនឹងទាក់ទងទៅអាជ្ញាធរមូលដ្ឋាន ដើម្បីពិនិត្យលើករណីនេះ។
លោក ម៉េត មាសភក្ដី ប្រាប់ថា៖«បើសិនជាសំណង់មកថ្មី ក្នុងនាមអាជ្ញាធររបស់យើងត្រូវតែទៅទប់ស្កាត់សិន មិនអាចឲ្យមានការសាងសង់កើតឡើងទេ តែបើសំណង់ហ្នឹងមានហើយ ឬក៏ចៃដន្យថា វាមានចន្លោះប្រហោង ស្រាប់តែមានសំណង់ហ្នឹង យើងត្រូវតែដោះស្រាយ មិនឲ្យមានសំណង់នេះមានបន្តទៀតទេ ព្រោះអីបើយើងដឹងច្បាស់ថា ជាផ្លូវសាធារណៈ បើជាសំណង់ឯកជនមិនអាចមានទេ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បានសង្កេតឃើញថា លោកប្រទះឃើញសំណង់រំលោភលើផ្លូវសាធារណៈស្ទើរតែគ្រប់ទីកន្លែងនៅក្នុងរាជធានីភ្នំពេញ ប៉ុន្តែ អាជ្ញាធរពុំបានគ្រប់គ្រងបញ្ហានេះឲ្យបានត្រឹមត្រូវនោះទេ។
លោកយល់ថា៖«ដើម្បីកុំឲ្យការមិនសប្បាយចិត្តកើតឡើងទាន់ អាជ្ញាធរត្រូវតែចាប់ផ្តើមដោះស្រាយជាមួយនឹងប្រជាពលរដ្ឋ ពេលដែលគាត់ធ្វើ គឺចាប់ផ្តើមនិយាយគ្នាឲ្យហើយថា ឲ្យប្លង់គាត់ត្រឹមណា គាត់ធ្វើបានកម្រិតណាឲ្យច្បាស់ មិនមែនគ្រាន់តែសង្កាត់គាត់ថា អត់មានមើលប្លង់នគរូបនីយកម្មទេ ត្រូវមើលប្លង់ឲ្យស្រួលបួលបានទៅរួច»។
មាត្រា៤៣ នៃច្បាប់ភូមិបាល បានចែងថា បុគ្គលដែលកាន់កាប់ដោយខុសច្បាប់លើទ្រព្យសម្បត្តិសាធារណៈ នឹងត្រូវបង្ខំឲ្យចាកចេញជាបន្ទាន់ និងគ្មានសិទ្ធិទាមទារសំណងនោះឡើយ។ ក្រៅពីនេះ បុគ្គលដែលរំលោភលើទ្រព្យសម្បត្តិសាធារណៈ ក៏នឹងត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ ៥ឆ្នាំ ព្រមទាំងពិន័យជាប្រាក់ពី ៥ ទៅ ១០លានរៀល៕