ប្រធានាធិបតីបារាំង លោក ហ្វ្រង់ស័រ ហូឡង់ នៅថ្ងៃនេះ បានជំរុញទៅអ្នកបោះឆ្នោត កុំឲ្យបោះឆ្នោតឲ្យអ្នកស្រី ម៉ារីន ឡឺប៉ែន បេក្ខនារីប្រធានាធិបតីស្ដាំនិយមជ្រុល នៅក្នុងការបោះឆ្នោតជ្រើសរើសប្រធានាធិបតីបារាំងជុំផ្ដាច់ព្រ័ត្រ ប្រកួតប្រជែងជាមួយបេក្ខជនអឺរ៉ុបនិយម លោក អែមម៉ានុយអ៊ែល ម៉ាក្រុន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
លោក ម៉ាក្រុន នឹងក្លាយទៅជាប្រធានាធិបតីបារាំងវ័យក្មេងបំផុត ក្រោយពីទទួលបានសំឡេងគាំទ្រនាំមុខគេ នៅក្នុងការបោះឆ្នោតជុំទី១ កាលពីថ្ងៃអាទិត្យកន្លងមកនេះ ជាមួយសំឡេងគាំទ្រជាង ២៤ភាគរយ ដោយបាននាំមុខមេដឹកនាំចលនាជាតិ អ្នកស្រី ឡឺប៉ែន ដែលទទួលបានសំឡេងឆ្នោតជាង ២១ភាគរយ។
ការបោះឆ្នោតនេះ បង្ហាញថា ប្រទេសបារាំងបានបាក់បែកគ្នាយ៉ាងជ្រាលជ្រៅ ដោយលោក ម៉ាក្រុន វ័យ ៣៩នាក់ ដែលជាអ្នកជំរុញឲ្យបើកចំហរព្រំដែន និងពាណិជ្ជកម្មសេរីនោះ បានទទួលការគាំទ្រនាំមុខគេនៅតាមបណ្ដាទីក្រុង ខណៈដែលអ្នកស្រី ឡឺប៉ែន បាននាំមុខនៅតាមតំបន់ជនបទ ដែលដើរយឺតយ៉ាវជាងនិន្នាការសកលភាវូបនីយកម្ម។
ក្នុងសុន្ទរកថាដ៏កម្រទៅកាន់អ្នកបោះឆ្នោត លោក ហូឡង់ បានព្រមានអំពីហានិភ័យសម្រាប់ប្រទេសបារាំង ប្រសិនបើអ្នកស្រី ឡឺប៉ែន ឈ្នះការបោះឆ្នោត ហើយលោកថា ខ្លួនលោកផ្ទាល់ក៏បោះឆ្នោតគាំទ្រលោក ម៉ាក្រុន ផងដែរ ដែលធ្លាប់កាន់តំណែងជារដ្ឋមន្ត្រីសេដ្ឋកិច្ចក្រោមរដ្ឋបាលលោក ហូឡង់រយៈពេល ២ឆ្នាំ៕