សេចក្ដីរាយការណ៍នានា បានឲ្យដឹងថា ប្រទេសកូរ៉េខាងជើងដែលមានគ្រាប់នុយក្លេអ៊ែរ នៅថ្ងៃនេះ បានប្រារព្ធពិធីរំលឹកខួបកងទ័ព ដោយមានសមយុទ្ធបាញ់គ្រាប់ពិត ខណៈដែលក្រុងសេអ៊ូលបានប្រកាសអំពីសមយុទ្ធកងទ័ពជើងទឹករួមគ្នាជាមួយនាវាដឹកយន្តហោះអាមេរិក នៅតំបន់កំពុងតែឡើងកម្ដៅ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្ដីមន្ទិលសង្ស័យបានកើនឡើងខ្ពស់ថា ក្រុងព្យុងយ៉ាងអាចនឹងសាកល្បងគ្រាប់បែកនុយក្លេអ៊ែរលើកទី៦ ឬគ្រាប់បាញ់គ្រាប់មីស៊ីល ដើម្បីជាការរំលឹកខួប ៨៥ឆ្នាំ នៃកំណើតកងទ័ពរបស់ខ្លួន។
ក្រសួងការពារជាតិកូរ៉េខាងត្បូង បាននិយាយថា គ្មានទេការសាកល្បង ឬការបាញ់គ្រាប់មីស៊ីលនោះ ដែលជាទូទៅ ត្រូវបានធ្វើឡើងនៅពេលព្រឹក ប៉ុន្តែ គ្មានដំណើរវិវត្តន៍បែបនោះ ត្រូវបានគេចាប់បាននោះឡើយ។
ផ្ទុយទៅវិញ ទីភ្នាក់ងារព័ត៌មានកូរ៉េខាងត្បូងយ៉ុនហាប់ បានដកស្រង់សម្ដីប្រភពរដ្ឋាភិបាលមិនបញ្ចេញឈ្មោះ ដែលបាននិយាយថា ក្រុងព្យុងយ៉ាងបានប្រារព្ធខួបនេះ ជាមួយសមយុទ្ធបាញ់គ្រាប់ពិតដ៏ធំមិនធ្លាប់មាន ដែលធ្វើឡើងនៅភាគខាងកើតទីក្រុងវ៉ុនសាន ហើយត្រូវបានគេសន្និដ្ឋានថា ស្ថិតក្រោមការឃ្លាំមើលពីមេដឹកនាំកូរ៉េខាងជើងលោក គីម ជុងអ៊ុន៕
