អតីតប្រធានាធិបតីអាមេរិក លោក បារ៉ាក់ អូបាម៉ា បានវិលត្រឡប់ទៅបង្ហាញខ្លួនជាសាធារណៈឡើងវិញនៅថ្ងៃនេះ ដោយបានថ្លែងថា លោកសង្ឃឹមថានឹងចំណាយពេលចុងក្រោយនៃជីវិតរបស់លោក ក្នុងការជួយរៀបចំភាពជាអ្នកដឹកនាំដល់អ្នកជំនាន់ក្រោយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
៣ខែក្រោយចាកចេញពីតំណែង លោក អូបាម៉ា បានចាកចេញពីគេហដ្ឋានដ៏ស្ងប់ស្ងាត់របស់លោកនៅទីក្រុងឈីកាហ្កូ និងបានថ្លែងទៅកាន់ទស្សនិកជនជាសិស្សវិទ្យាល័យ និងនិស្សិតមហាវិទ្យាល័យជាង ៤០០នាក់ នៅឯសាកលវិទ្យាល័យឈីកាហ្កូ។
ទស្សនិកជនបានក្រោកឈរស្វាគមន៍លោក ខណៈដែលលោកដើរឡើងទៅលើឆាកអមទៅដោយសិស្សនិស្សិត ៦នាក់ សម្រាប់ពិភាក្សាអំពីតម្រូវការសម្រាប់ការចូលរួមកាន់តែទូលំទូលាយរបស់សង្គមស៊ីវិល នៅក្នុងចំណោមប្រជាជនក្មេងៗ។
អតីតប្រធានាធិបតីវ័យ ៥៥ឆ្នាំរូបនេះ ដែលបានបញ្ចប់ការកាន់តំណែងសេតវិមាន ២អាណត្តិកាលពីខែមករានោះ បាននិយាយថា លោកមានគំនិតសុទិដ្ឋិនិយមយ៉ាងខ្លាំងអំពីអនាគត។
លោកបន្តថា រឿងសំខាន់ដែលលោកអាចធ្វើបាននោះ គឺជួយតាមវិធីណាមួយ ដើម្បីរៀបចំភាពជាអ្នកដឹកនាំសម្រាប់ជំនាន់ក្រោយ សម្រាប់ការផ្លាស់ប្ដូរពិភពលោក៕