លោក ហ៊ុន សែន មេដឹកនាំគណបក្សកាន់អំណាចបានព្រមាន លោក កឹម សុខា មេដឹកនាំគណបក្សប្រឆាំង ខណៈដែលគណបក្សធំៗទាំងពីរកំពុងបង្ហាញកម្លាំងគាំទ្រប្រហាក់ប្រហែលគ្នាក្នុងយុទ្ធនាការបោះឆ្នោត។
ក្នុងពិធីសំណេះសំណាល ជាមួយគ្រីស្ទបរិស័ទ ដែលធ្វើនៅកោះពេជ្រ នៅថ្ងៃព្រហស្បតិ៍នេះ លោក ហ៊ុន សែន បានបង្ហាញការខឹងសម្បារនឹងលោក កឹម សុខា ដោយថាមេដឹកនាំគណបក្សប្រឆាំងបានយកសមិទ្ធផលរបស់គណបក្សកាន់អំណាចទៅឃោសនាបោះឆ្នោត។ លោកថ្លែងថា «លោកបាននិយាយថា បក្សកាន់អំណាចធ្វើតាមការទាមទាររបស់លោកអំពីប្រាក់ខែនិងអំពីថ្លៃភ្លើង។ លោកត្រូវចាំឲ្យច្បាស់ ពេលនោះលទ្ធភាពថវិកាវាអត់មាន តែនេះ២០១៧ហើយ។ លោកកុំឆ្លៀតយកចំណេញពីសមិទ្ធផលរបស់គណបក្សប្រជាជនដែលដឹកនាំរាជរដ្ឋាភិបាលឲ្យសោះ!»។
ក្នុងពេលឃោសនាក្នុងខេត្តបាត់ដំបង កាលពីថ្ងៃម្សិលមិញ លោក កឹម សុខា ថ្លែងថា អ្នករិះគន់ដែលនិយាយថា កម្មវិធីនយោបាយសម្រាប់ការបោះឆ្នោតឃុំ សង្កាត់ របស់គណបក្សសង្គ្រោះជាតិមិនអាចធ្វើបាននោះ គួរតែពិនិត្យមើលការអនុវត្តរបស់គណបក្សកាន់អំណាចនៅក្នុងការបញ្ចុះតម្លៃអគ្គិសនី និងការដំឡើងបៀវត្សរ៍ដល់មន្ត្រីរាជការ និងទាហាននៅពេលនេះ ដោយលោកថា គណបក្សកាន់អំណាចធ្វើតាមការទាមទាររបស់គណបក្សសង្រ្គោះជាតិកាលពីការបោះឆ្នោតជាតិឆ្នាំ២០១៣។ លោកថ្លែងថា «នៅពេលនោះគេនិយាយថាកុំជឿពួកគេ!តើមានលុយមកពីណា?ប៉ុន្តែឥឡូវប្រាក់ខែ១លានរៀលហើយពីព្រោះគេខ្លាចចាញ់ឆ្នោត»។
លោក ហ៊ុន សែន ព្រមានទៅលោក កឹម សុខា ទៀតថា «ខ្ញុំសូមផ្តាំទៅលោក កឹម សុខា! លោកច្រើនដងពេកហើយ…គ្រាន់តែចង់បានប្រធានរដ្ឋសភាធ្វើបាតុកម្មអស់ប៉ុន្មានខែ? គេអត់ណាស់! ខ្ញុំបាននិយាយជាមួយលោកច្បាស់។ ខ្ញុំចាប់ដៃលោកក្នុងរដ្ឋសភា ខ្ញុំថាម៉េចឯកឧត្តម? មានវីដេអូឃ្លីបមួយ ឯកឧត្តមនិយាយថា ឥឡូវឡើងទៅចឹង។ ចុះឬមិនចុះ? បើមិនចុះទេអង្រួនឲ្យចុះ។ ខ្ញុំបានព្រមានត្រង់ៗថា បើពេលនោះឯកឧត្តមធ្វើ ថ្ងៃនេះគឺជាថ្ងៃបុណ្យខ្មោចរបស់ឯកឧត្តម! ខ្ញុំមិនខ្លាចនឹងធ្វើជាមួយការបំផ្លាញណាមួយចាប់បង្ខំឲ្យរដ្ឋាភិបាលស្របច្បាប់ត្រូវរំលាយនោះទេ»។
ដោយថ្លែងការពារសំដីរបស់ លោក ទៀ បាញ់ ដែលគំរាមវាយបាក់ធ្មេញអ្នកតវ៉ានោះ លោក ហ៊ុន សែន នៅតែបន្តគំរាមដដែលៗទៀតថា បើគណបក្សប្រជាជនចាញ់នឹងមានសង្រ្គាមកើតដោយចោទថាមកពីអ្នកគាំទ្រគណបក្សប្រឆាំងប្រើពាក្យញុះញង់និងវាយប្រហារមកលើគណបក្សកាន់អំណាច។ លោកព្រមានថា «ខ្ញុំជូនសារឲ្យអស់លោកភ្លឺភ្នែក! ហើយកុំបន្ទោស ទៀ បាញ់ កុំបន្ទោស ប៉ុល សារឿន អំពីការធ្វើសេចក្តីថ្លែងការណ៍ប្រឆាំងបដិវត្តន៍ពណ៌។ ទង្វើណាក៏ដោយដែលនាំទៅដល់ការផ្តួលរំលំគឺជាទង្វើដែលត្រូវតែបង្រ្កាបដាច់ខាតតែម្តង។គ្មានការអត់ឱនទេដើម្បីធានាជីវិតមនុស្សរាប់លាននាក់ យើងសុខចិត្តកំចាត់ចោល១០០-២០០នាក់ ព្រោះយើងធ្លាប់បានឃើញនៅអតីតកាល»។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា លោកមិនចាប់អារម្មណ៍នឹងប្រសាសន៍របស់លោក ហ៊ុន សែន នោះទេ ដោយលោកអំពាវនាវឲ្យពលរដ្ឋទៅបោះឆ្នោតឃុំ សង្កាត់ ដើម្បីផ្លាស់ប្តូរមេដឹកនាំថ្មី ទើបធ្វើឲ្យសង្គមជាតិមានសន្តិភាព។ លោកនិយាយថា« ខ្ញុំសូមឲ្យបងប្អូនប្រជាពលរដ្ឋម្ចាស់ឆ្នោត ផ្តោតអារម្មណ៍លើការបោះឆ្នោតថ្ងៃទី៤មិថុនា ឆ្នាំ២០១៧ ហើយបោះឆ្នោតឲ្យគណបក្សសង្គ្រោះជាតិ បោះឆ្នោតដើម្បីបញ្ជៀសសង្គ្រាម បោះឆ្នោតដើម្បីសន្តិភាពដែលមានយុត្តិធម៌ ហើយបោះឆ្នោតដើម្បីដោះស្រាយដែលសេសសល់តំាងពីមុនមក ដើម្បីឲ្យជីវភាពបងប្អូនយើងទូទំាងប្រទេសទទួលបាននូវផលប្រយោជន៍សេដ្ឋកិច្ចប្រកបដោយសមធម៌ រឿងដទៃទៀតគឺយើងមិនចំាបាច់ចាប់អារម្មណ៍ទេ»។
ប៉ុន្ដែអ្នកវិភាគបញ្ហាសង្គម លោក មាស នី វិភាគថា សារព្រមានពីសង្គ្រាមនេះអាចមានហេតុផលខ្លះដែរ ដោយលោកសន្និដ្ឋានថា រដ្ឋាភិបាលទំនងជាដឹងខ្លួនមុន ឬទទួលបានព័ត៌មានច្បាស់ការណាមួយថា ក្នុងជួរកងកម្លាំងប្រដាប់អាវុធ ពួកគេអាចមិនគាំទ្រគណបក្សប្រជាជនមួយរយភាគរយនោះទេ ឬលោកថា មានខ្លះគាំទ្របក្សប្រឆាំងដែរ។
លោកវិភាគទៀតថា ប្រសិនបើសង្គ្រាមកើតមានដោយសារគណបក្សសង្គ្រោះជាតិឈ្នះឆ្នោតនោះ គឺវាមិនអាចទៅរួចទេ ដោយលោកថា គណបក្សប្រឆាំងមិនមានកម្លាំងទ័ពនៅក្នុងដៃ ពោលគឺមានតែរដ្ឋាភិបាលប៉ុណ្ណោះ។ លោកថា សង្គ្រាមអាចកើតមាន លុះណាតែមានកម្លាំងប្រដាប់អាវុធពីរប្រឈមមុខដាក់គ្នា។
លោកថា៖ «ខ្ញុំគិតថា វាជាការឃោសនាហ្នឹង ក៏ប៉ុន្ដែប្រសិនជាយើងពិនិត្យមើលតាមដានរឿងហ្នឹង វាហាក់ដូចជា ប្រមុខរដ្ឋាភិបាលគាត់អាចដឹងថា នៅក្នុងជួរកងទ័ព ឥឡូវហ្នឹង បើសិនជាយើងមើលពីកម្លាំងប្រដាប់អាវុធ វាអត់មានកម្លាំងប្រដាប់អាវុធណា ក្រៅពីកម្លាំងប្រដាប់អាវុធរបស់រដ្ឋាភិបាល។ អញ្ចឹងទំនងហាក់ដូចជា រដ្ឋាភិបាលគាត់បានដឹងថា កងកម្លាំងប្រដាប់អាវុធទាំងអស់នៅនៅក្រោមការគ្រប់គ្រង ស្មោះស្ម័គ្រជាមួយរដ្ឋាភិបាលទេ […]បើសិនជាមិនផ្ទេរអំណាច ឧទាហរណ៍ថា ឥឡូវសង្គ្រោះជាតិឈ្នះឆ្នោត បើសិនជា មិនប្រគល់អំណាចឲ្យសង្គ្រោះជាតិ នឹងមានសង្គ្រាម។ អ្នកណានឹងចេញមកច្បាំង?»៕
រាយការណ៍បន្ថែមដោយ ណាត សុភាព
