សន្លឹកឆ្នោតដល់ទៅជាង ១៣ម៉ឺនសន្លឹក ត្រូវបានគេរកឃើញថា ជាសន្លឹកឆ្នោតមិនបានការ ក្រោយការបោះឆ្នោតក្រុមប្រឹក្សាឃុំសង្កាត់នាពេលថ្មីៗនេះ។
ក្នុងសេចក្ដីព្រាងនៃលទ្ធផលបោះឆ្នោតជ្រើសរើសក្រុមប្រឹក្សាឃុំសង្កាតអាណត្តិទី៤ ដែលចែកចាយនៅលើទំព័រហ្វេសប៊ុករបស់លោក រ៉ុង ឈុន សមាជិកមួយរូបរបស់ គ.ជ.ប. កាលពីថ្ងៃម្សិលមិញនោះ បានបង្ហាញថា ពលរដ្ឋដល់ទៅជាង ៧លាន ១០ម៉ឺននាក់ ឬស្មើនឹងជាង ៩០ភាគរយ បានចេញទៅបោះឆ្នោត នៅក្នុងចំណោមពលរដ្ឋមានចុះក្នុងបញ្ជីឈ្មោះបោះឆ្នោតសរុបជាង ៧លាន ៨៦ម៉ឺននាក់។
នៅក្នុងចំណោមសន្លឹកឆ្នោតទាំងនោះ សន្លឹកឆ្នោតបានការមានចំនួនជាង ៦លាន ៩៧ម៉ឺនសន្លឹក ខណៈដែលសន្លឹកឆ្នោតមិនបានការមានចំនួនជាង ១៣ម៉ឺន ៣ពាន់សន្លឹក។
សន្លឹកឆ្នោតមិនបានការ ត្រូវបាន គ.ជ.ប. កំណត់ថា ជាសន្លឹកឆ្នោតដែលត្រូវបានពលរដ្ឋគូសមិនត្រឹមត្រូវទៅតាមសេចក្ដីណែនាំរបស់ គ.ជ.ប.៕
