ក្រសួងយុត្តិធម៌ថៃ បានសម្រេចបង្កកគណនីធនាគារមួយចំនួនរបស់អតីតនាយករដ្ឋមន្ត្រី អ្នកស្រី យីងឡាក់ ស៊ីណាវ៉ាត់ ពាក់ព័ន្ធនឹងការពិន័យជាទឹកប្រាក់ ១ពាន់លានដុល្លារ ពីសំណាក់របបយោធាថៃ ជុំវិញកម្មវិធីស្រូវអង្ករអំឡុងអ្នកស្រីនៅមានអំណាច។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដោយបានដកស្រង់សម្ដីពីក្រសួងយុត្តិធម៌ថៃ និងក្រុមអ្នកច្បាប់របស់អ្នកស្រី យីងឡាក់។
អ្នកស្រី យីងឡាក់ បានស្នើទៅតុលាការឲ្យលុបចោលសេចក្ដីសម្រេចបង្កកគណនីធនាគារ និងបញ្ឈប់ការការរឹបអូសទ្រព្យសម្បត្តិរបស់អ្នកស្រី ដោយអ្នកស្រីថា សេចក្ដីសម្រេចទាំងពីរនេះ ខុសច្បាប់។
អ្នកស្រី យីងឡាក់ ដែលត្រូវបានទម្លាក់ពីអំណាចនៅក្នុងរដ្ឋប្រហារយោធាមួយកាលពីឆ្នាំ២០១៤នោះ នឹងត្រូវធ្វើសេចក្ដីសន្និដ្ឋានចុងក្រោយ នៅក្នុងករណីព្រហ្មទណ្ឌដាច់ដោយឡែកមួយទៀតនៅសប្ដាហ៍ក្រោយនេះ ជុំវិញកម្មវិធីស្រូវអង្ករដ៏ចម្រូងចម្រាស់។
កម្មវិធីស្រូវអង្ករនោះ បានជួយឲ្យអ្នកស្រីឈ្នះការបោះឆ្នោតកាលពីឆ្នាំ២០១១។ កម្មវិធីនោះ បានប្រមូលទិញស្រូវពីប្រជាកសិករក្នុងតម្លៃលើសទីផ្សារ និងចាប់បង្ខំតម្លៃអង្ករនៅលើទីផ្សារអន្តរជាតិ ប៉ុន្តែ កម្មវិធីស្រូវអង្ករនេះ មានប្រជាប្រិយភាពនៅក្នុងចំណោមអ្នកបោះឆ្នោតនៅតាមតំបន់ជនបទ។
រដ្ឋលេខាធិការអចិន្ត្រៃយ៍នៃក្រសួងហិរញ្ញវត្ថុ លោក ស៊ុំឆៃ ស៊ុតឆាពង្សសែស បានប្រាប់អ្នកសារព័ត៌មានកាលពីថ្ងៃម្សិលមិញថា គណៈកម្មាធិការរដ្ឋាភិបាលបានបញ្ជូនព័ត៌មានលម្អិតអំពីគណនីធនាគារចំនួន ១២ ដែលជាកម្មសិទ្ធិរបស់អ្នកស្រី យីងឡាក់ ទៅឲ្យអគ្គនាយកដ្ឋានប្រតិបត្តិច្បាប់។
ក្រុមការងារច្បាប់អ្នកស្រី យីងឡាក់ បាននិយាយថា អ្នកស្រី យីងឡាក់ បានទទួលសេចក្ដីជូនដំណឹងអំពីការបង្កកគណនីធនាគាររបស់អ្នកស្រីរួចហើយកាលពីថ្ងៃម្សិលមិញនេះ៕