អគ្គស្នងការនគរបាលជាតិ រំឭកមន្ត្រីជំនាញ ឲ្យបន្តអនុវត្តន៍វិធានការ បន្សាបឥទ្ធិពលលើអ្នករិះគន់ មានក្រុមអង្គការសង្គមស៊ីវិល និងអ្នកប្រើប្រាស់បណ្តាញសង្គម ដោយថា ដើម្បីរក្សាស្ថេរភាពសង្គម និងពង្រឹងផ្ទៃក្នុងជាតិ។
របាយការណ៍ប្រជុំប្រចាំឆមាស វាយតម្លៃសភាពការណ៍ សន្តិសុខ កាលពីម្សិលមិញ អគ្គស្នងការនគរបាលជាតិ បានលើកឡើងថា ៦ខែកន្លងទៅកម្ពុជានៅតែរក្សាបាននូវសន្តិភាព ឯករាជ្យ អធិបតេយ្យជាតិ បូរណភាពទឹកដី ទប់ស្កាត់និងបញ្ចៀសបាននូវអំពើភារវកម្ម និងឧក្រិដ្ឋកម្មឆ្លងដែន និងបានទប់ស្កាត់ អ្នកប្រើប្រាស់បណ្តាញសង្គមមួយចំនួនចោទប្រកាន់រដ្ឋាភិបាលដែលរបាយការណ៍សរសេរថា«ជាពួកអមិត្ត»។
របាយការណ៍ដដែលលើកឡើងទៀតថា សម្រាប់ការងារសន្តិសុខ នៅឆមាសទី២ មន្ត្រីជំនាញគ្រប់នាយកដ្ឋាន រួមទាំងស្នងការនរគបាលរាជធានី ខេត្ត« ត្រូវពង្រឹងវិធានការជំនាញគ្រប់គ្រង និងក្តាប់ព័ត៌មាន គ្រប់សមាសភាពនៃអង្គការសង្គមស៊ីវិល ពិសេសក្រុមដែលមាននិន្នាការប្រឆាំង(ទាំងក្នុងនិងក្រៅប្រទេស) សំដៅរកឲ្យឃើញ និងចាត់វិធានការបន្សាបឥទ្ធិពល ឬលុបនូវឧបាយកលញុះញង់បំបែកបំបាក់សាមគ្គីភាពប្រជាជាតិ ការប៉ុនប៉ងបង្កអស្ថេរភាពសង្គម និងបង្កើតឲ្យមានភាពច្របូកច្របល់ផ្នែកនយោបាយគ្រប់រូបភាព»។
របាយការណ៍បន្តទៀតថា «លើកកម្ពស់គុណភាពការងារប្រឆាំងឧក្រិដ្ឋកម្មឆ្លងដែន ពិសេសអ្នកប្រើប្រាស់ប្រព័ន្ធបច្ចេកវិទ្យាព័ត៌មានទំនើបបំពុលបរិយាកាសសន្តិសុខ។ ត្រូវជំរុញការគ្រប់គ្រងមុខសញ្ញាគោលដៅដែលមាននិន្នាការប្រឆាំងរាជរដ្ឋាភិបាល ដើម្បីមានវិធានការបង្កាទប់ស្កាត់ក្នុងករណីចាំបាច់»។
យ៉ាងនេះក្តីរបាយការណ៍មិនបានជំរុញឲ្យមន្ត្រីជំនាញស៊ើបអង្កេតទៅលើអ្នកប្រើប្រាស់បណ្តាញសង្គមដែលធ្លាប់គំរាមសម្លាប់ អ្នកវិភាគនយោបាយ ដូចជា លោក អ៊ូ វីរៈ លោកបណ្ឌិត ឡៅ ម៉ុងហៃ និងមេដឹកនាំបក្សប្រឆាំងលោក កឹម សុខា នោះទេ។
ប៉ុន្តែអ្នកនាំពាក្យក្រសួងមហាផ្ទៃលោក ខៀវ សុភ័គ អះអាងថា ក្រសួងនឹងចាត់វិធានការករណីនេះបើមានពាក្យបណ្តឹង។
លោកថា៖ «ខ្លួនឯងមិនប្តឹងមិនចាប់ទោសអូសដំណើរគេ ឲ្យសមត្ថកិច្ចកាត់ទោសយ៉ាងម៉េច។ សមត្ថកិច្ចរាប់ម៉ឺននាក់ អង្គុយតែបម្រើលោកឯងយ៉ាងម៉េច។ ឧទារណ៍គំរាមខ្ញុំមើល ខ្ញុំប្តឹងចាប់បានឥឡូវ គំរាមក្មួយមើល ក្មួយប្តឹងចាប់បានឥឡូវ ប៉ុន្តែក្មួយធ្វើមិនដឹង។ ហ្អឺ! ម្ចាស់គេ គេចង់តែឲ្យគំរាម ដើម្បីយកល្បី»។
អ្នកនាំពាក្យសមាគមអាដហុក លោក សំ ចាន់គា ស្វាគមន៍ទៅនឹងវិធានការនេះ សម្រាប់អ្នកប្រើប្រាស់បណ្តាញសង្គមដែលគ្មានក្រមសីលធម៌និងគ្មានវិជ្ជាជីវៈ។ ប៉ុន្តែលោកដាក់ការសង្ស័យថា វិធានការនោះអាចជាការគំរាមដល់សេរីភាពបញ្ចេញមតិច្រើនជាង។
លោកថា៖ «រដ្ឋាភិបាលកំពុងតែយកលេស ដើម្បីបន្ទុចបង្អាក់សកម្មភាពអង្គការសង្គមស៊ីវិល ទាំងឡាយណាដែលគេសុចរិត ក្នុងការប្តល់អំណាច ឬក៏បណ្តុះបណ្តាលដល់ប្រជាពលរដ្ឋ ឲ្យយល់ដឹងពីសិទ្ធិរបស់ពួកគេ»។
ទោះជាយ៉ាងណាអគ្គស្នងការនគរបាលក៏បានជំរុញឲ្យមន្ត្រីជំនាញទាំងអស់ឲ្យខិតខំរួមឲ្យគ្នាពុះពារកាត់បន្ថយបទល្មើសព្រហ្មទណ្ឌទូទៅ និងអំពើល្មើសច្បាប់ផ្សេងៗទៀត ឲ្យមានការថយចុះ ពង្រឹងប្រសិទ្ធភាព ភូមិឃុំ មានសុវត្ថិភាព ធានាសណ្តាប់ធ្នាប់សង្គម ដូចជាទប់ស្កាប់បទល្មើសជួយដូរមនុស្ស គ្រឿងញៀន អំពើចោរកម្មជាដើម៕