ក្រសួងធនធានទឹក និងឧតុនិយម អំពាវនាវទៅពលរដ្ឋឲ្យបង្កើនការប្រុងប្រយ័ត្នចំពោះអាកាសធាតុ ដោយថា ចាប់ពីថ្ងៃនេះរហូតដល់ដើមសប្តាហ៍ក្រោយ កម្ពុជានឹងមានភ្លៀងធ្លាក់រាយប៉ាយស្ទើរទូទាំងប្រទេស។
ក្នុងសេចក្តីជូនដំណឹងចុះថ្ងៃទី២៤ខែសីហា ក្រសួងបានឲ្យដឹងថា ចាប់ពីថ្ងៃនេះ រហូតដល់ថ្ងៃទី ៣១ ខែសីហា ភ្លៀងនឹងធ្លាក់ពីបង្គួរទៅច្រើន រាយប៉ាយស្ទើរពេញមួយសប្តាហ៍ ពិសេសនៅតំបន់ខ្ពង់រាបភាគឦសាន និងតំបន់មាត់សមុទ្រ។
ក្រសួងបញ្ជាក់ថា ភ្លៀងធ្លាក់រាយប៉ាយបែបនេះ បណ្ដាលមកពីកម្ពុជាទទួលរងឥទ្ធិពល ពីសម្ពាធទាប កំពុងអូសបន្លាយភាគខាងជើង ប្រទេសថៃ ឡាវ និងវៀតណាម នៅក្នុងមហាសមុទ្រប៉ាស៊ីហ្វិក ខាងកើតប្រទេសហ្វីលីពីន។
ក្រសួងបន្ថែមទៀតថា ប្រព័ន្ធសម្ពាធទាបខាងលើ នឹងធ្វើដំណើរឆ្លងចូលមកសមុទ្រចិនខាងត្បូង នៅថ្ងៃទី២៧ខែសីហាខាងមុខ នឹងវិវត្តខ្លួនទៅជាវិសម្ពាធ ឬជាកូនព្យុះ។
ក្រសួងធនធានទឹក និងឧតុនិយម បានប្រកាសប្រាប់ប្រជាពលរដ្ឋដែលរស់ជិតមាត់ទន្លេ អ្នកនេសាទ និងអ្នកធ្វើដំណើរតាមសមុទ្រ ត្រូវបង្កើនការប្រុងប្រយ័ត្នខ្ពស់ ដោយថា នឹងមានរលកខ្ពស់ៗ ខ្យល់បកខ្លាំង ចាប់ពីថ្ងៃទី ២៧ដល់ថ្ងៃទី៣០ខែសីហាខាងមុខ៕
ម៉ាប់ ស៊ុយ [email protected]
