ក្រុមមន្ត្រីបានឲ្យដឹងថា មន្ត្រីអនុរក្សបរិស្ថានម្នាក់និងពលរដ្ឋ៧នាក់ នៅឯស្រុកសណ្ដាន់ ខេត្តកំពង់ធំ បានស្លាប់ ខណៈដែលជាង២០នាក់ កំពុងសម្រាកព្យាបាលនៅមន្ទីរពេទ្យនៅឡើយ បន្ទាប់ពីពួកគេបរិភោគសាច់ជ្រូកព្រៃចម្អិនមិនល្អ។
អធិការនគរបាលស្រុកសណ្ដាន់ លោក អ៊ួង ម៉ូលី បានប្រាប់វីអូឌីតាមទូរសព្ទនៅថ្ងៃចន្ទនេះថា ចំនួនអ្នកស្លាប់ បានកើនឡើងដល់ចំនួន៨នាក់ហើយ ក្នុងនោះមានមន្ត្រីបរិស្ថានការពារព្រៃឡង់ម្នាក់ផងដែរ បន្ទាប់ពីពួកគេបរិភោគសាច់ជ្រូកព្រៃឆៅ។
លោកបន្ថែមថា ប្រជាពលរដ្ឋជាង២៤នាក់ទៀត ត្រូវបានបញ្ជូនទៅសម្រាកព្យាបាលនៅមន្ទីរពេទ្យ ក្នុងនោះមានមន្ត្រីអនុរក្សធនធានធម្មជាតិចំនួន១៤នាក់ផងដែរ។
ដោយផ្អែកទៅតាមការអះអាងពីមន្ទីរសុខាភិបាលខេត្តកំពង់ធំ មន្ត្រីនគរបាលរូបនេះ បានឲ្យដឹងថា ប្រជាពលរដ្ឋ និងមន្ត្រីបរិស្ថាន បានធ្លាក់ខ្លួនឈឺ និងស្លាប់ បន្ទាប់ពីបរិភោគសាច់សត្វជ្រូកព្រៃសម្បូរទៅដោយមេរោគ។
លោកថា «សាច់ជ្រូកមានរោគ យើងអត់ដឹង ជូនកាលឆៅអី បងប្អូនយើងហូបឆៅ ខ្លះអាមេរោគ តាមពេទ្យធ្វើកោសល្យវិច័យមានពងព្រូន ចង់និយាយកូនដង្កូវនៅក្នុងសាច់(ជ្រូក) ចឹងគាត់ប្រហែលជាមានសត្វល្អិតនៅក្នុងខ្លួន សត្វល្អិតហ្នឹងចេញពីសាច់ជ្រូកមកដែរ យើងហូបឆៅ វាចេញតាមគៀន តាមសរសៃឈាម តាមពេទ្យនិយាយចឹងហើមៗហើមដៃ ហើមជើង ហើមមុខហើមមាត់ ហើមខ្លួនទាំងអស់»។
លោកបន្តថា ប្រជាពលរដ្ឋខ្លះ ក្នុងចំណោមពលរដ្ឋធ្លាក់ខ្លួនឈឺ និងដែលត្រូវបានបញ្ជូនទៅសម្រាកព្យាបាលនៅមន្ទីរពេទ្យនោះ បានធូរស្រាលហើយ ហើយពលរដ្ឋខ្លះទៀត នៅមិនទាន់បានធូរស្រាលនៅឡើយទេ។
ប្រធានមន្ទីសុខាភិបាលខេត្តកំពង់ធំ លោក ស្រី ស៊ីន អះអាងថា ពលរដ្ឋនិងមន្ត្រីការពារបរិស្ថាន បានធ្លាក់ខ្លួនឈឺ និងស្លាប់ ដោយសារ បរិភោគសាច់ជ្រូកព្រៃឆៅ ដោយមិនបានចម្អិន។
លោកថា៖ «យើងបានបញ្ជាក់ច្រើនហើយ តាមព័ត៌មានដែលផ្សាយចេញទៅ គឺមកពីហូបសាច់ជ្រូកព្រៃឆៅ ដែលមានពងដង្កូវព្រូនសាច់ជ្រូកដែលគាត់ហូបហ្នឹង គឺនៅនឹងព្រៃ យើងមិនដឹងថាគាត់យកមកពី និយាយព័ត៌មានយើងតែគាត់ហូបជ្រូកព្រៃដែលចាប់បាននៅនឹងព្រៃហ្នឹង»។
មន្ត្រីសុខាភិបាលរូបនេះ បានអំពាវនាវទៅប្រជាពលរដ្ឋ និងមន្ត្រីបរិស្ថាន ឲ្យប្រុងប្រយ័ត្ន និងត្រូវមានអនាម័យ។
ករណីនេះបង្ហាញផងដែរថា ក្រុមមន្ត្រីការពារធនធានធម្មជាតិ បានចូលរួមបំផ្លាញសត្វព្រៃ ផ្ទុយទៅនឹងតួនាទីរបស់ពួកគេ និងដូចទៅនឹងសម្ដីលោកនាយករដ្ឋមន្ត្រី ហ៊ុន សែន ដែលបានរិះគន់ចំពោះមន្ត្រីមួយចំនួនកាលពីថ្ងៃទី២២ ខែសីហាថា ពួកគេនៅតែបរិភោគសាច់សត្វព្រៃ បើទោះបីជាមានច្បាប់ហាមឃាត់ការបរិភោគសត្វព្រៃទាំងអស់នោះក៏ដោយ។
លោក ហ៊ុន សែន មានប្រសាសន៍ថា៖ «ការបរបាញ់សត្វ គឺនៅតែមានជាបន្ត ថាមិនត្រូវទទួលទានសត្វព្រៃទេ ក៏ប៉ុន្តែមិនថាអ្នកមាន អ្នកក្រទេ ចូលចិត្តសត្វព្រៃជាង(សត្វស្រុក)។ នៅត្រង់ណាក៏ដោយ រកជ្រូកព្រៃ រកសាច់ឈ្លូស រកប្រើស។ មានពេលមួយ ខ្ញុំព្រះករុណាខ្ញុំ ប្រកាសថា មនុស្សទាំងអស់គួរតែឈប់ទទួលទានសាច់ប្រើស សាច់ឈ្លូស សាច់សត្វព្រៃ ប៉ុន្តែដល់(តែ)រួច(ទៅ ទទួលទាន)សម្លម្ជូរសាច់ជ្រូកព្រៃ»។
របាយការណ៍ក្រសួងសុខាភិបាលចេញកាលថ្ងៃទី១២ ខែកញ្ញាកន្លងមក បានបង្ហាញឲ្យដឹងថា ករណីពុលចំណីអាហារនៅក្នុងឆ្នាំ២០១៧នេះ កើតមានលើមនុស្សជាង ៩០០នាក់ ហើយបណ្តាលឲ្យមានអ្នកស្លាប់ ៤នាក់ ដែលចំនួននេះបានធ្លាក់ចុះជិត ២០ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន។
បើយោងតាមរបាយការណ៍ក្រសួងសុខាភិបាល មនុស្សដល់ទៅ ៣៨២៤នាក់ បានពុលចំណីអាហាររយៈពេល ៣ឆ្នាំចុងក្រោយនេះ គិតចាប់ពីឆ្នាំ២០១៥មក ក្នុងនោះ មនុស្ស ៤៧នាក់បានស្លាប់ ដោយសារពុលស្រាមានផ្ទុកសារធាតុមេតាណុលខ្ពស់៕
