យោងតាមការប្រកាសរបស់អ្នកនាង ឡាយ លក្ខិណា ក្នុងពេលដែលអ្នកនាងបង្ហាញមុខឡើងច្រៀងនៅលើកញ្ចក់ទូរទស្សន៍ CTN កាលពីថ្ងៃទី២៣ កញ្ញា អ្នកនាងបញ្ជាក់ថា អ្នកនាងនឹងត្រលប់ចូលមកកាន់វិថីសិល្បៈជាថ្មីវិញហើយ ដោយសារតែត្រលប់មកលើកនេះ គឺអ្នកនាងនឹងទទួលរាល់ការអញ្ជើញរបស់បណ្ដាទូរទស្សន៍សម្រាប់ការឡើងឆាកនិងច្រៀងខេត្តក្រុងនោះផង។ យ៉ាងណាមិញ មានការបញ្ជាក់ថាអ្នកនាងនៅតែបន្តអាជីពលក់ខោអាវដូចដើមដដែល បើទោះជាការលក់ដូររបស់អ្នកនាងនៅផ្សារអូរឫស្សីត្រូវគេឃើញថាប្ដូរម្ចាស់ថ្មី។
លោក អែន ឌី ដែលមានទំនាក់ទំនងជិតស្និទ្ធិជាមួយអ្នកនាង ឡាយ លក្ខិណា និងបានចាប់ដៃអ្នកនាងឡើងច្រៀងយ៉ាងភ្ញាក់ផ្អើលនៅលើកញ្ចក់ទូរទស្សន៍មុននេះ បានថ្លែងជំនួសថាតូបលក់ខោអាវរបស់អ្នកនាងនៅផ្សារអូរឫស្សី មិនបានបិទចោលនោះទេ គឺគ្រាន់តែអ្នកនាងផ្លាស់ប្ដូរទីតាំង ហើយទីទាំងចាស់ គឺអ្នកនាងអោយអ្នកផ្សេងមើលការខុសត្រូវ។
លោកមិនបានបញ្ជាក់ច្បាស់ថាតូបលក់ខោអាវរបស់អ្នកនាងនៅផ្សារអូរឫស្សី តើលក់អោយគេ ឬអោយបងប្អូនក្រុមគ្រួសារអ្នកនាងជាអ្នកគ្រប់គ្រងនោះទេ ដោយអ្នកនាងបានប្រាប់លោកត្រឹមថា អ្នកនាងមិនបានបិទចោលមុខជំនួញមួយនោះ ព្រោះតែសម្រេចចិត្តហក់ចូលសិល្បៈប៉ុណ្ណោះ។
លោកថាមុខរបរលក់សំលៀកបំពាក់របស់អ្នកនាងបានប្ដូរពីផ្សារអូរឫស្សីទៅផ្សារទួលគោក ដោយនៅកន្លែងថ្មីនោះ គឺអ្នកនាងនៅតែអង្គុយលក់ដូចមុនដដែល ដោយក្នុងតូបថ្មីនោះមិនឃើញមុខអ្នកនាងតែពេលអ្នកនាងជាប់ចេញទៅក្រៅប៉ុណ្ណោះ។
លោកថាអ្នកនាងមិនចោលមុខរបរលក់ខោអាវនោះទេ បើទោះជាអ្នកនាងត្រូវសម្រេចចិត្តទទួលច្រៀងលើឆាកតន្ត្រីដូចដើម។ លោកថាអ្នកនាង ឡាយ លក្ខិណា រមែងចេញចូលប្រទេសថៃ និងបរទេសផ្សេងទៀត ដើម្បីទៅយកខោអាវ និងឥវ៉ាន់មួយចំនួន មកតាំងលក់ក្នុងហាង តែមិនទាន់ដឹងថារហូតដល់ពេលណាទើបអ្នកនាងនឹងបើកជាហាងធំដុំសម្រាប់អាជីវកម្មលក់ដូរខោអាវនេះទេ ក្នុងពេលដែលអ្នកនាងក៏រវល់នឹងការទទួលថតម៉ូដ
និងឡើងឆាកទូរទស្សន៍ក្រោយការប្រកាសអោយដឹងថាចូលសិល្បៈជាថ្មីបែបនេះ។
មកទល់ពេលនេះ លោកថាអ្នកនាងអត់មានកូនចៅនៅក្រោមបន្ទុកនោះទេ ប៉ុន្តែសម្រាប់រឿងប្ដីសី គឺលោកមិនច្បាស់ដែរ ដោយសារតែមិនបានដឹង។ អ្វីដែលលោកមានការព្រួយបារម្ភ គឺអ្នកនាងមានទម្លាប់ចាស់ទុំជាងមុន
និងបានប្រាប់ថាចូលចិត្តស្លៀកពាក់តែសំលៀកបំពាក់បែបស្រគត់ស្រគំនិងបុរាណៗ ទើបលោកយល់ថាសម្រាប់កម្មវិធីតន្ត្រី ដែលចង់អោយអ្នកនាងទៅច្រៀងលោតកញ្ឆេងលើឆាកដូចមុន គឺអ្នកនាងនឹងអាចប្រកែក។
លោកថាអ្នកនាង ឡាយ លក្ខិណា អាចមានភាគរយតិចសម្រាប់ការទទួលថតរឿង ដោយសារតែអ្នកនាងក៏មិនចង់បិទតូបលក់ខោអាវព្រោះតែការងារសិល្បៈបង្ខំអោយអ្នកនាងបាត់មុខរាល់ថ្ងៃ។ អ្នកនាងប្រាប់លោកថាទទួលតែការងារឡើងច្រៀងនិងថតស្ពត ដែលតម្រូវអោយរវល់តែមួយថ្ងៃឬកន្លះថ្ងៃប៉ុណ្ណោះ ចំណែកការងារសិល្បៈដែលតម្រូវអោយអ្នកនាង ត្រូវទុកតូបចោល ហើយមកប្រមូលលុកកាក់ពីសិល្បៈ គឺអាចមិនច្បាស់។
យ៉ាងណាមិញ លោកថាអ្នកនាងក៏អាចពិចារណានោះដែរ ប្រសិនបើខាងផលិតករផ្ដល់តំណែងអោយអ្នកនាងបានសម្ដែងសមរម្យ ហើយសាច់រឿងដែលចង់អោយអ្នកនាងសម្ដែងក៏មើលទៅពេញចិត្តអ្នកនាង។ លោកថាអ្នកនាងត្រលប់មកកាន់សិល្បៈលើកនេះ មិនមែនដោយអស់ផ្លូវ ហើយចង់ល្បីឈ្មោះជាថ្មីម្ដងទៀតនោះទេ ប៉ុន្តែបណ្ដាលមកពីលោកនិងមិត្តភ័ក្រ្តដទៃចេះតែលើកទឹកចិត្តខ្លាំងពេក ហើយគាប់ជួនជាអ្នកនាងក៏មិនទាន់នឹងដាច់អាល័យជាមួយនឹងការងារច្រៀងរាំផង ទើបអ្នកនាងដាក់ចិត្តថាទទួលចេញមុខម្ដងទៀត។ លោកនៅតែអះអាងថា អ្នកនាង ឡាយ លក្ខិណា អត់ចង់ល្បីឈ្មោះប្រជែងជាមួយតារាក្មេងៗនោះទេ ប៉ុន្តែហេតុផលនៃការត្រលប់ក្រោយគឺដោយសារអ្នកនាងចង់កុំអោយមហាជនភ្លេចមុខខ្លាំងពេក និងលំហែអារម្មណ៍បន្ថែមពីលើមុខជំនួញ ទើបអ្នកនាងសម្រេចចិត្តជាន់ដាន់ចាស់លើកនេះ។
លោកថាអ្នកនាងស្រឡាញ់អាជីពលក់ខោអាវជាងជាងការងារថត និងច្រៀង ដោយសារតែភាពជាក់ស្ដែងគឺអ្នកនាងទទួលការងារសិល្បៈតែរង្វង់ថ្ងៃណាដែលតូបលក់សំលៀកបំពាក់របស់អ្នកនាងមិនមានភ្ញៀវសម្រុកខ្លាំងប៉ុណ្ណោះ តែបើចំថ្ងៃម៉ូយមកយកទំនិញឬចំថ្ងៃត្រូវឡើងទៅយកឥវ៉ាន់ដើម្បីបំពេញហាង គឺអ្នកនាងមិនទទួលតែម្ដង។
អ្នកនាងនឹងគ្រោងចាប់ដៃជាមួយលោកឡើងប៉ុស្ដិ៍ទូរទស្សន៍មួយ២ទៀតក្នុងពេលដ៏ខ្លី ដែលកម្មវិធីត្រូវឡើងបន្តគឺអាចជាកម្មវិធីតន្ត្រីរបស់ MY TV CTN និងក្នុងកម្មវិធីលេងហ្គេមរបស់ទូរទស្សន៍ជាដើម។ យ៉ាងណាមិញ អ្នកនាងក៏អាចនឹងឡើងច្រៀងរាំតែឯងតាមការតម្រូវរបស់អ្នករៀបចំកម្មវិធីនោះដែរ ប្រសិនបើការអញ្ជើញនោះគឺអ្នកនាងពេញចិត្ត។
ជាមួយនឹងការបញ្ជាក់អោយដឹងរបស់លោក អែន ឌី បានបង្ហាញយ៉ាងច្បាស់ថា អ្នកនាង ឡាយ លក្ខិណា ពិតជាវិលត្រលប់មកកាន់សិល្បៈដូចអំឡុងជាង១០ឆ្នាំមុនទៀតហើយ ដោយការត្រលប់មកលើកនេះ គឺមិនមែនដោយសារតែអ្នកនាងឡុងចុងមុខជំនួញដូចការលើកឡើងក្រោយពេលតូបរបស់អ្នកនាងនៅផ្សារអូរឫស្សី ត្រូវបានជំនួសដោយអ្នកថ្មីនោះទេ។ អ្នកនាងនៅតែមិនចោលមុខរបរនោះ ដោយគ្រាន់តែបានផ្លាស់ប្ដូរទីតាំងពីទៅបើកនៅផ្សារទួលគោកជាជំនួសប៉ុណ្ណោះ។
លោកថា អ្នកនាង ឡាយ លក្ខិណា គឺជាតារាល្បីឈ្មោះក្នុងជំនាន់អ្នកនាង ពេជ្រ ច័ន្ទបូរមី, ស្រីតូច ចំណាន, និងសៀម ស្រីណុច ដែលក្នុងពេលនោះអ្នកទាំង៤ត្រូវបានគេអោយឈ្មោះថាជារាជិនីសម្រស់ និងជាតារាលំដាប់ជួរមុខក្នុងពិភពសម្ដែង និងចម្រៀង។
គួរបញ្ជាក់ថា អ្នកនាង ឡាយ លក្ខិណា ធ្លាប់បានល្បីល្បាញយ៉ាងខ្លាំងមុនពេលលាឈប់សិល្បៈកាលពីអំឡុងដើមទសវត្យរ៍ឆ្នាំ២០០០។ អ្នកនាងបានសម្រេចចិត្តបាត់មុខពីសិល្បៈបន្ទាប់ពីមានវាសនាភ្ជាប់ពាក្យជាមួយមន្ត្រី
សំបូរទ្រព្យម្នាក់ ដោយទទួលបានថ្លៃបណ្ណាការ និងចិញ្ចៀនភ្ជាប់ពាក្យនៅក្នុងពេលនោះរហូតដល់រាប់ម៉ឺនដុល្លារ
និងត្រូវបានគេចាត់ទុកថាមានសំណាងជាងគេក្នុងចំណោមតារាល្បីរួមជំនាន់។
ប៉ុន្តែអ្នកនាងបែរជាមានវាសនាប្រែប្រួល ក្រោយពីបាក់បែកស្នេហ៍ ក្នុងពេលដែលតារាស្រី៣រូបទៀត ដែលជាប់ឈ្មោះជារាជិនីជាមួយនឹងអ្នកនាងបានក្លាយជាអ្នកមានសំណាងទៅវិញដូចជា អ្នកនាង ពេជ្រ ច័ន្ទបូរមី បានក្លាយជាភរិយារបស់មន្ត្រីផ្កាយ២នៅក្រសួងមហាផ្ទៃ អ្នកនាងស្រីតូច ចំណាន បានក្លាយជាភរិយារបស់លោក គិត ម៉េង និងអ្នកនាង សៀម ស្រីណុច ដែលជារាជនីសម្រស់ក្រោមការទទួលស្គាល់របស់មហាជនដូចគ្នានឹងអ្នកនាងដែរនោះ បានក្លាយជាភរិយារបស់អ្នកជំនួញម្នាក់នៅអាមេរិក៕
