គណបក្សប្រឆំាង បានឲ្យដឹងថា ដើម្បីឲ្យស្ថានការណ៍នយោបាយនៅកម្ពុជា វិលទៅរកភាពល្អប្រសើរឡើងវិញ បក្សនេះថា មានតែអ្នកនយោបាយខ្មែរនិងខ្មែរទេ ទើបដោះស្រាយវិបត្តិនយោបាយនេះបាន។
សាររបស់គណបក្សប្រឆំាងនេះ ធ្វើឡើងបន្ទាប់ពី សហគមន៍អន្តរជាតិលោកសេរី បានចេញសេចក្តីថ្លែងការណ៍ជាបន្តបន្ទាប់ ជំរុញឲ្យអ្នកនយោបាយខ្មែរ ត្រូវដោះស្រាយបញ្ហានយោបាយនៅកម្ពុជា ដោយថាដើម្បីឲ្យការបោះឆ្នោតនៅឆ្នាំ២០១៨ មានអព្យាក្រឹត សេរី និងយុត្តិធម៌។
ក្នុងសន្និសីទសារព័ត៌មាននៅថ្ងៃទី២៥ ខែកញ្ញានេះ តំណាងរាស្ត្រគណបក្សសង្គ្រោះជាតិ លោក សុន ឆ័យ បានថ្លែងថា ការចាប់ខ្លួនមេដឹកនាំគណបក្សប្រឆំាង លោក កឹម សុខា ធ្វើឲ្យស្ថានការណ៍នយោបាយនៅកម្ពុជា កាន់តែឡើងកម្តៅ ដោយលោកថា ករណីនេះ មានតែខ្មែរនិងខ្មែរទេ ទើបដោះស្រាយឲ្យស្ថានការណ៍នយោបាយនៅកម្ពុជា ទៅរកភាពល្អប្រសើរឡើងវិញ។
លោកថ្លែងថា៖ «ការដោះស្រាយបញ្ហានៃប្រទេសមួយ អ្វីដែលជាការងារដែលធ្វើជោគជ័យ ហើយមានប្រសិទ្ធភាព គឺការដោះស្រាយរវាងខ្មែរនិងខ្មែរ បរទេសគ្រាន់តែជួយជំរុញឲ្យមានការយកចិត្តទុកដាក់ រវាងខ្មែរនិងខ្មែរឲ្យដោះស្រាយបញ្ហាដោយខ្លួនឯងទេ ព្រោះការអនុវត្តឲ្យមានប្រសិទ្ធភាព គឺវាអាស្រ័យលើខ្មែរ និងខ្មែរ គឺយើងមានការពិសោធន៍នៅឆ្នាំ១៩៩១ បើទោះបីអន្តរជាតិចង់ឲ្យប្រទេសកម្ពុជាមានសន្តិភាព ក៏វាត្រូវភាគី [ពាក់ព័ន្ធ]…និយាយគ្នាដែរ ដើម្បីដោះស្រាយបញ្ហាទំាងអស់នេះ»។
អ្នកនំាពាក្យគណបក្សប្រជាជនកម្ពុជាលោក សុខ ឥសាន មិនចាប់អារម្មណ៍ និងការលើកឡើងរបស់លោក សុន ឆ័យ នោះទេ។ លោកថា គណបក្សកាន់អំណាច មិនអាចយកវប្បធម៌និទណ្ឌភាពមកជជែកគ្នាបានទេ ដោយថា កុំឲ្យប៉ះពាល់ដល់នីតិរដ្ឋនៅកម្ពុជា។
លោកនិយាយថា៖ «យើងមិនអាចយកវប្បធម៌និទណ្ឌភាព យកមកអនុវត្តក្នុងប្រទេសប្រជាធិបតេយ្យ និងនីតិរដ្ឋបានទេ ព្រោះយើងអនុវត្តច្បាប់ បើកាលណា យកការសម្របសម្រួល ដើម្បីរំលោភទៅលើនីតិវិធីច្បាប់ បានសេចក្តីថា យើងយកវប្បធម៌និទណ្ឌភាពមកនិយាយ»។
អ្នកវិភាគនយោបាយ លោក ឯម សុវណ្ណារ៉ា ធ្លាប់មានប្រសាសន៍ថា បើស្ថានការណ៍នយោបាយកម្ពុជា នៅតែបន្តឡើងកំដៅ ហើយមិនមានការជជែកគ្នារវាងអ្នកនយោបាយបក្សកាន់អំណាច និងបក្សប្រឆំាង។ លោកថា សហគមន៍អន្តរជាតិ ដែលជាប់កាតព្វកិច្ចឃ្លាំមើលដំណើរការវិវឌ្ឍនៃដំណើរការប្រជាធិបតេយ្យនៅកម្ពុជា អាចនឹងប្រើយន្តការដាក់សម្ពាធ។
លោកថា៖ «យន្តការរបស់សហគមន៍អន្តរជាតិមានច្រើន។ ដំបូងគេបញ្ឈប់កូតា ឬក៏អាចគេបិទទីផ្សារតែម្តង ទាក់ទិននឹងការនាំចេញផលិតផលសម្លៀកបំពាក់កម្ពុជា បន្ទាប់មក គេអាចផ្តាច់ជំនួយយោធា បន្ទាប់មកបិទទីផ្សារ ហុំព័ទ្ធសេដ្ឋកិច្ចប្រសិន បើកម្ពុជាមិនប្រកាន់គោលការណ៍ប្រជាធិបតេយ្យ មិនអាចនិយាយជាការព្រមព្រៀងអន្តរជាតិបាន»។
លោក កឹម សុខា ត្រូវ បានសមត្ថកិច្ចចាប់ខ្លួន ទាំងមានអភ័យឯកសិទ្ធិសភា តាមការបញ្ជារបស់លោកនាយករដ្ឋមន្ត្រី ហ៊ុន សែន កាលពីរំលងអធ្រាត្រ ថ្ងៃទី៣ ខែកញ្ញា ដោយចោទថាពីបទក្បត់ជាតិ។ ហើយ បើគ្មានអ្វីប្រែប្រួលនោះទេ លោក កឹម សុខា ក៏នឹងត្រូវចូលរួមសវនាការ នៅថ្ងៃស្អែក ទី២៦ ខែកញ្ញា លើបណ្តឹងសុំនៅក្រៅឃុំ។
លិខិតរបស់អគ្គនាយកដ្ឋានពន្ធនាគារ ផ្ញើទៅអគ្គព្រះរាជអាជ្ញាសាលាឧទ្ធរណ៍ កាលពីថ្ងៃទី១៨ ខែកញ្ញា បានស្នើឲ្យសាលាឧទ្ធរណ៍ពិចារណាឡើងវិញ ក្នុងការតម្រូវឲ្យនាំខ្លួនលោក កឹម សុខា ពីពន្ធនាគារត្រពាំផ្លុង ខេត្តត្បូងឃ្មុំ ដើម្បីចូលរួមសវនាការនៅថ្ងៃទី២៦ ស្អែកនេះ ដោយថា ព្រួយបារម្ពពីបញ្ហាសន្តិសុខ សុវត្ថិភាព មេបក្សប្រឆំាងរូបនោះ។
យ៉ាងណាក៏ដោយ ក្នុងករណីពុំមានវត្តមាន លោក កឹម សុខា នៅក្នុងសវនាការ នៅសាលាឧទ្ធរណ៍នាថ្ងៃស្អែកនេះ លោក សុន ឆ័យ អះអាងថា តំណាងរាស្ត្រគណបក្សសង្គ្រោះជាតិ នឹងនាំគ្នាទៅចូលរួម តាមដានស្តាប់សវនាការលើសំណុំរឿងលោក កឹម សុខា ផងដែរ៕
