សេចក្ដីរាយការណ៍ពីទីភ្នាក់ងារព័ត៌មានអន្តរជាតិ បានឲ្យដឹងថាសាលារៀនភាគច្រើននៅទីក្រុងម៉ិកស៊ិក បន្តបិទទ្វារនៅឡើយរហូតដល់ថ្ងៃចន្ទនេះ បន្ទាប់ពីគ្រោះរញ្ជួយដីដ៏មហន្តរាយកាលពីសប្ដាហ៍មុន ប៉ុន្តែ ក្មេងៗនៅក្រៅរដ្ឋធានីនេះ គ្រោងនឹងវិលត្រឡប់ទៅសាលារៀនរបស់ពួកគេវិញហើយ បើទោះបីជាភាពភ័យខ្លាចនៅបន្តញាំញីប្រទេសនេះក៏ដោយ។
ទីភ្នាក់ងារព័ត៌មាន Reuters បានផ្សាយថា ប្រតិបត្តិការស្វែងរកមនុស្សនៅរដ្ឋធានីនេះ មានលក្ខណៈពិបាកដោយត្រូវប្រឈមនឹងអគារបាក់បែកដួលរលំ ដោយសារតែរញ្ជួយដីកម្លាំង ៧.១រ៉ិចទ័រ កាលពីថ្ងៃអង្គារសប្ដាហ៍មុន ដែលបានសម្លាប់មនុស្សយ៉ាងតិច ៣២០នាក់។
រញ្ជួយដីនេះបានបង្ខំមនុស្សរាប់ម៉ឺននាក់ឲ្យគ្មានជម្រកផ្ទះសម្បែង ហើយមនុស្សជាច្រើនបានរស់នៅក្រោមជម្រកតង់នៅតាមផ្លូវ ឬនៅតាមជម្រកសង្គ្រោះ ប៉ុន្តែ មានសញ្ញាបង្ហាញថា មនុស្ស ២០លាននាក់ ដែលកំពុងរស់នៅតំបន់ទីក្រុងនោះ បានចាប់ផ្ដើមវិលជីវិតរបស់ពួកគេឡើងវិញបណ្ដើរៗហើយ។
សង្កាត់ខ្លះក្នុងចំណោមសង្កាត់រងផលប៉ះពាល់ភាគច្រើន អគារទាំងឡាយដែលសាងសង់នៅនៅបឹងបុរាណ នៅតែបន្តរាំងស្ទះដល់ប្រតិបត្តិការស្វែងរកមនុស្សរបស់ក្រុមជួយសង្គ្រោះ។
សាលារៀនជាង ៤ម៉ឺន ៤ពាន់កន្លែងនៅក្នុងរដ្ឋទាំង ៦ នឹងត្រូវបើកទ្វារឡើងវិញនៅថ្ងៃចន្ទនេះ ប៉ុន្តែ មានតែសាលារៀន ១០៣កន្លែងប៉ុណ្ណោះនៅទីក្រុងម៉ិកស៊ិក បានរងការខូចខាតបាក់បែករចនាសម្ព័ន្ធ។
ក្រុមមន្ត្រីនិយាយថា ពួកគេមិនចង់រារាំងការងារជួយសង្គ្រោះនោះទេ ហេតុនេះ សាលារៀនរដ្ឋជាង ៤ពាន់ និងសាលារៀនឯកជនជាច្រើននៅរដ្ឋធានី នឹងនៅតែបន្តបិទទ្វារដដែល៕