ប្រមុខរដ្ឋាភិបាលកម្ពុជា និងជាប្រធានគណបក្សប្រជាជន អះអាងជាថ្មីថា លោកនឹងអាចបន្ដកាន់តំណែងជានាយករដ្ឋមន្ដ្រីចំនួន១០ឆ្នាំទៀត បើទោះបីជាមានសម្ពាធពីសហគមន៍អន្ដរជាតិ។
ថ្លែងពីខេត្តស្ទឹងត្រែង ក្នុងពិធីបិទទ្វារទឹកទំនប់វារីអគ្គិសនី «សេសានក្រោម២» នៅថ្ងៃទី២៥ ខែកញ្ញា ឆ្នាំ២០១៧ នេះ លោកនាយករដ្ឋមន្ដ្រី ហ៊ុន សែន អះអាងថា លោកនឹងអាចរស់នៅយ៉ាងហោចណាស់៣០ឆ្នាំទៀត និងថា ការកាន់តំណែងនាយករដ្ឋមន្ដ្រីចំនួន១០ឆ្នាំ ឬស្មើនឹង២អាណត្តិទៀតនោះ គឺជារឿងងាយស្រួល សម្រាប់រូបលោក។
លោកថា៖ «[…]ហើយខ្ញុំជឿជាក់លើខ្លួនឯងថា យ៉ាងហោចណាស់ ខ្ញុំរស់យ៉ាងតិច៣០ឆ្នាំ អញ្ចឹងការបន្ដធ្វើនាយករដ្ឋមន្ដ្រីចំនួន១០ឆ្នាំទៀត មិនមែនជាបញ្ហាលំបាកសម្រាប់ខ្ញុំទេ ខ្ញុំសូមអរគុណ! ហើយសង្ឃឹមជឿជាក់ទៅលើការគាំទ្រ របស់ប្រជាពលរដ្ឋ[…]»។
ការថ្លែងជាថ្មីរបស់លោក ហ៊ុន សែន ធ្វើឡើងស្របពេលមជ្ឈដ្ឋានជាតិ និងអន្ដរជាតិ បានចេញសេចក្ដីថ្លែងការណ៍រិះគន់ និងថ្កោលទោសជាបន្ដបន្ទាប់ ដោយថា រដ្ឋាភិបាលរបស់លោក ហ៊ុន សែន បានធ្វើទុក្ខបុកម្នេញ និងយាយីដល់ក្រុមអង្គការសង្គមស៊ីវិល បណ្ដាញសារព័ត៌មានឯករាជ្យ និងការចាប់ខ្លួនប្រធានគណបក្សសង្គ្រោះជាតិ លោក កឹម សុខា។
ករណីនេះ កាលពីថ្ងៃទី១៨ខែកញ្ញា កន្លងទៅ សមាជិកសភាអាមេរិកចំនួន៨រូប បានផ្ញើលិខិតរួមគ្នា ទៅរដ្ឋមន្ត្រីការបរទេសអាមេរិក លោក Rex Tillerson ដោយទទូចឲ្យរដ្ឋាភិបាលអាមេរិក ធ្វើការជាមួយប្រទេសសម្ព័ន្ធមិត្ត និងសហគមន៍អន្តរជាតិ ដើម្បីដាក់សម្ពាធលើរដ្ឋាភិបាលកម្ពុជា ឲ្យមានការគោរពច្បាប់ គោរពសិទ្ធិមនុស្ស និងសិទ្ធិសេរីភាពសារព័ត៌មាន។
ក្នុងលិខិតនោះ សមាជិកសភាអាមេរិក បានបញ្ជាក់ថា ពួកគេមានការព្រួយបារម្ភ ពីស្ថានភាពសិទ្ធិមនុស្ស ការគោរពច្បាប់ និងសេរីភាពសារព័ត៌មាន ចាប់តាំងពីមានការបិទអង្គការអន្តរជាតិ NDI ការចាប់ខ្លួនមេបក្សប្រឆាំង និងការយាយីស្ថាប័នព័ត៌មានឯករាជ្យជាបន្តបន្ទាប់។ ក្នុងលិខិតដដែលនោះ សមាជិកសភាអាមេរិក ក៏បានលើកឡើងនូវក្ដីបារម្ភថា កម្ពុជាដើរចេញពីគន្លងលទ្ធិប្រជាធិបតេយ្យ ដែលពួកគេថា អាចប៉ះពាល់ដល់ដំណើរការបោះឆ្នោតនៅឆ្នាំក្រោយ។
អ្នកនយោបាយជើងចាស់ លោក លឺ ឡាយស្រេង វិភាគថា លោក ហ៊ុន សែន នឹងមិនអាចជាប់ឆ្នោត ធ្វើជានាយករដ្ឋមន្ដ្រីមួយអាណត្តិទៀតឡើយ ប្រសិនបើរដ្ឋាភិបាលមួយនេះ បន្ដបង្ក្រាប និងចាប់ចងក្រុមអ្នករិះគន់។
លោក លឺ ឡាយស្រេង វិភាគទៀតថា សហគមន៍អន្ដរជាតិ នឹងដាក់គំនាបយ៉ាងពិតប្រាកដ ដោយលោកថា សម្ពាធនយោបាយនោះ នឹងធ្វើឲ្យរងទុក្ខតែប្រជាពលរដ្ឋខ្មែរ ដែលនាំឲ្យពួកគេស្អប់ខ្ពើម និងលែងមានជំនឿលើរដ្ឋាភិបាលរបស់លោក ហ៊ុន សែន តទៅទៀត។
លោក ហ៊ុន សែន ដែលសព្វថ្ងៃ មានអាយុ៦៥ឆ្នាំ បានគ្រប់គ្រងកម្ពុជា រយៈពេលជាង៣ទស្សវត្សមកហើយ ចាប់ពីឆ្នាំ១៩៨៥មក។ លោក ហ៊ុន សែន ត្រូវបានការសែតអាមេរិក «វ៉ាស៊ិនតោនប៉ុស្តិ៍» ចាត់ចំណាត់ថ្នាក់ ជាមេដឹកនាំកាន់អំណាចដ៏យូរបំផុត ក្នុងចំណោមមេដឹកនាំ២៣រូបទៀត ដែលថា មិនព្រមចុះចេញពីតំណែង បើទោះជាមានបាតុកម្មទាមទារឲ្យលាលែង ឬពេលចាញ់ឆ្នោតក៏ដោយ។
កាសែតអាមេរិក ដដែលនេះ សរសេររិះគន់ថា កម្ពុជាក្រោមការគ្រប់គ្រងរបស់លោក ហ៊ុន សែន មានទាំងជោគជ័យ ភាពរីកចម្រើន ការភ័យខ្លាច និទណ្ឌភាព បក្សពួក គ្រួសារនិយម និងអំពើពុករលួយ៕
