អាមេរិកបានសម្រេចដាក់បម្រាមលើពលរដ្ឋមកពីកូរ៉េខាងជើង មិនឲ្យជាន់ទឹកដីអាមេរិកនោះឡើយ ដែលនេះគឺជាផ្នែកមួយនៃវិធានការថ្មីហាមឃាត់ការធ្វើដំណើរ បន្ថែមពីលើវិធានការកន្លងមករបស់រដ្ឋបាលអាមេរិក ដែលបានដាក់ការហាមឃាត់លើប្រទេសអ៊ីរ៉ង់ ឆាត លីប៊ី ស៊ីរី វេណេហ្ស៊ូអេឡា យ៉េមែន និងសូម៉ាលី។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
ដោយផ្អែកតាមរដ្ឋបាលរបស់លោក ដូណាល់ ត្រាំ Reuters បានចុះផ្សាយបន្តថា វិធានការថ្មីនេះ ដែលនឹងចូលជាធរមាននៅថ្ងៃទី១៨ ខែតុលាខាងមុខនោះ បានកើតឡើងបន្ទាប់ពីការសើរើវិធានការដំបូងរបស់ប្រធានាធិបតី ដូណាល់ ត្រាំ ដែលត្រូវបានតុលាការបដិសេធចោលនោះ។
ការដាក់បញ្ចូលកូរ៉េខាងជើង និងវេណេហ្ស៊ូអេឡានេះ បានពង្រីកវិធានការដើម ដែលដំបូងឡើយផ្ដោតសំខាន់តែទៅលើបណ្ដាប្រទេសមូស្លីមតែប៉ុណ្ណោះ។
រដ្ឋាភិបាលអាមេរិកប្រកាសថា កូរ៉េខាងជើងមិនបានសហការជាមួយរដ្ឋាភិបាលអាមេរិកក្នុងការគោរព និងបំពេញទៅតាមលក្ខខណ្ឌចែករំលែកព័ត៌មានគ្នានោះទេ។
មន្ត្រីរដ្ឋបាលម្នាក់ ដែលបានថ្លែងប្រាប់ក្រុមអ្នកសារព័ត៌មាននោះ បានទទួលស្គាល់ថា ចំនួនពលរដ្ឋកូរ៉េខាងជើងធ្វើដំណើរទៅអាមេរិក មានចំនួនតិចខ្លាំងណាស់នាពេលសព្វថ្ងៃនេះ៕
