អតីតមន្ត្រីជាន់ខ្ពស់នៃរដ្ឋាភិបាលទីក្រុងហុងកុង អ្នកស្រី Carrie Lam ត្រូវបានជ្រើសរើសជាមេដឹកនាំថ្មីនៃទីក្រុងហុងកុង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលផ្អែកតាមការផ្សាយរបស់ទូរទស្សន៍ Cable TV។
Reuters បានចុះផ្សាយបន្តថា ភាគច្រើននៃពលរដ្ឋទីក្រុងហុងកុងចំនួន ៧.៣លាននាក់ ពុំបាននិយាយអ្វីពីការជ្រើសរើសមេដឹកនាំសម្រាប់អតីតដែនដីអាណានិគមអង់គ្លេសនេះទេ។
Reuters បានលើកឡើងចុះដូច្នេះ នោះក៏ព្រោះតែអ្នកស្រី Carrie Lam មិនត្រូវបានពលរដ្ឋបោះឆ្នោតឲ្យទេ ប៉ុន្តែ ត្រូវបានជ្រើសរើសដោយគណៈកម្មាធិការបោះឆ្នោតមួយ ដែលមានសមាជិក ១២០០នាក់ ដែលសុទ្ធតែជាអ្នកមានភក្តីភាពនឹងក្រុងប៉េកាំង។
ដែនដីទីក្រុងហុងកុង ត្រូវបានចក្រភពអង់គ្លេសប្រគល់ទៅឲ្យចិនវិញនៅឆ្នាំ១៩៩៧ ហើយការជ្រើសរើសមេដឹកនាំថ្មីនេះ ត្រូវបានធ្វើឡើងចំពេលដែលមានភាពតានតឹងជាមួយក្រុងប៉េកាំង៕
