ផ្ទាំងកម្រាលថ្មមួយ បានបាក់ធ្លាក់នៅឯរោងចក្រថាមពលមួយនៅប្រទេសចិនកាលពីថ្ងៃម្សិលមិញនេះ ដោយបានសម្លាប់មនុស្ស ៩នាក់ ហើយ ២នាក់ទៀតរងរបួស។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សេចក្ដីរាយការណ៍របស់ទីភ្នាក់ងារព័ត៌មានចិនស៊ិនហួ។
ស៊ិនហួ ដែលបានដកស្រង់សម្ដីមន្ត្រីរដ្ឋាភិបាលមូលដ្ឋាន បានផ្សាយថា គ្រោះថ្នាក់នោះ បានកើតឡើងលើរោងចក្រថាមពលលេខ ៧ ស្ថិតនៅភាគខាងត្បូងនៃខេត្តក្វាងទុង។
រោងចក្រថាមពលនោះ កំពុងស្ថិតក្នុងដំណើរការសាងសង់នៅឡើយ នៅពេលវាបាក់រលំ ហើយរដ្ឋាភិបាលបានចាប់ផ្ដើមស៊ើបអង្កេតលើគ្រោះថ្នាក់នេះ។
បើតាម Reuters គ្រោះថ្នាក់ផ្សេងៗ បានកើតឡើងយ៉ាងញឹកញាប់នៅក្នុងរោងចក្រឧស្សាហកម្មក្នុងប្រទេសចិន។
កំហឹងជុំវិញកង្វះស្តង់ដារសុវត្ថិភាពនេះ កាន់តែរីកធំឡើង បន្ទាប់ពីប្រទេសចិនបានទទួលកំណើនសេដ្ឋកិច្ចយ៉ាងឆាប់រហ័សនៅក្នុងរយៈពេល ៣ទសវត្សរ៍មកហើយ ប៉ុន្តែ ប្រទេសនេះបែរជារុំព័ទ្ធទៅដោយគ្រោះថ្នាក់នានា ចាប់ពីគ្រោះថ្នាក់នៅតាមអណ្ដូងរ៉ែ រហូតដល់អគ្គិភ័យនៅតាមរោងចក្រ៕
