តំណាងប្រជាពលរដ្ឋ ១២២គ្រួសារដែលមានជម្លោះដីធី្លមកពីស្រុកអន្លង់វែង ខេត្តឧត្តរមានជ័យ គ្រោងនាំគ្នាទៅដាក់ពាក្យបណ្តឹងស្វែងរកអន្តរាគមន៍សារជាថ្មីពីស្ថាប័នពាក់ព័ន្ធ បន្ទាប់ពីអាជ្ញាធរខេត្តនេះលើកស្លាកបង្ហាញទីតាំងបែងចែកដី។
តំណាងប្រជាពលរដ្ឋ លោក ហឿន ហាក់ ប្រាប់ VOD នៅព្រឹកថ្ងៃនេះថា ក្រុមពលរដ្ឋមកពីភូមិជប់ត្រកួន និងអូរអំបិល ស្ថិតក្នុងឃុំអន្លង់វែង បានធ្វើដំណើរមករាជធានីភ្នំពេញ ដើម្បីស្នើសុំអាជ្ញាធរពាក់ព័ន្ធ ឲ្យជួយពន្លឿនដំណោះស្រាយសម្រាប់ជម្លោះដីធ្លីរបស់ពួកគេទំហំជាង ៤០០ហិចតា ដោយថា អ្នកភូមិមិនទទួលបានចំណែកដីធ្លីនៅក្នុងគម្រោងដីសម្បទានសង្គមកិច្ចនោះទេ បន្ទាប់ពីអាជ្ញាធរខេត្តបានបង្ហាញទីតាំងបែងចែកដីរួចមក។
តំណាងអ្នកភូមិរូបនេះ បានប្រាប់ឲ្យដឹងថា ក្រុមអ្នកភូមិនឹងប្រឈមមុខនឹងភាពក្រីក្រ ដោយសារតែពុំមានដីបង្កបង្កើនផលនៅក្នុងរដូវវស្សាខាងមុខនេះ។
បើតាមគម្រោង តំណាងពលរដ្ឋមានជម្លោះដីធ្លី ២៥នាក់ គ្រោងនឹងយកពាក្យបណ្តឹង ទៅដាក់ជូនលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្រសួងមហាផ្ទៃ និងខុទ្ទកាល័យលោកនាយករដ្ឋមន្ត្រី ហ៊ុន សែន នៅរសៀលថ្ងៃនេះ។
បើតាមតំណាងប្រជាពលរដ្ឋ ជម្លោះដីធ្លីរបស់ពួកគេ និងក្រុមហ៊ុនឯកជនមួយ បានចាប់ផ្ដើមផ្ទុះឡើងកាលពីឆ្នាំ២០១៥ និងឈានទៅដល់ការឃាត់ខ្លួនពលរដ្ឋម្នាក់នៅឆ្នាំ២០១៧កន្លងមកនេះ ប៉ុន្តែ ត្រូវបានដោះលែងវិញ៕