ក្រុមស្រាវជ្រាវសុវត្ថិភាពប្រព័ន្ធកុំព្យូទ័រ បានឲ្យដឹងថា យុទ្ធនាការឃោសនានយោបាយរបស់បេក្ខជនប្រធានាធិបតីបារាំង លោក អ៊ីម៉ានុយអ៊ែល ម៉ាក្រុន ក្លាយជាគោលដៅនៃការវាយលុកពីសំណាក់ក្រុមចោរអ៊ីនថឹណិតរុស្ស៊ីកាលពីខែមុន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រុម Trend Micro ដែលមានមូលដ្ឋាននៅជប៉ុន បាននិយាយថា ក្រុម Pawn Storm ដែលមានទំនាក់ទំនងនឹងការវាយប្រហារធំៗនៅបណ្ដាប្រទេសលោកខាងលិច បានប្រើប្រាស់បច្ចេកទេសបោកបញ្ឆោត ដើម្បីព្យាយាមលួចព័ត៌មានផ្ទាល់ខ្លួនពីលោក ម៉ាក្រុន និងសមាជិកនៃក្រុមយុទ្ធនាការរបស់លោក។
ក្រុម Pawn Storm ក៏ត្រូវបានគេជឿផងដែរថា ស្ថិតនៅពីក្រោយនៃការវាយប្រហារទៅលើគណៈកម្មាធិការជាតិប្រជាធិបតេយ្យអាមេរិក កាលពីឆ្នាំមុន ប៉ុន្តែ សំដៅបំផ្លាញយុទ្ធនាការឃោសនារបស់អ្នកស្រី ហ៊ីលឡារី គ្លីនតុន។
ក្រុមនេះត្រូវបានគេសង្ស័យថាមានទំនាក់ទំនងនឹងទីភ្នាក់ងារសន្តិសុខរុស្ស៊ី ហើយក្រុងមូស្គូត្រូវបានគេមើលឃើញថា ជាអ្នកគាំទ្របេក្ខនារីប្រធានាធិបតីបារាំង អ្នកស្រី ម៉ារីន ឡឺ ប៉ែន ដែលជាគូប្រជែងតំណែងប្រធានាធិបតីនឹងលោក ម៉ាក្រុន។ អ្នកស្រី ឡឺ ប៉ែន ធ្លាប់ជួបប្រធានាធិបតីរុស្ស៊ី លោក វ៉្លាឌីមៀ ពូទីន នៅក្នុងដំណើរទស្សនកិច្ចដ៏គួរឲ្យភ្ញាក់ផ្អើលមួយទៅកាន់ទីក្រុងមូស្គូ នៅមុនការបោះឆ្នោត។
លោក ម៉ាក្រុន និងអ្នកស្រី ឡឺ ប៉ែន គឺជាបេក្ខជនពីរនាក់ចុងក្រោយសម្រាប់ការបោះឆ្នោតជុំចុងក្រោយនៅថ្ងៃទី៧ ខែឧសភាខាងមុខ បន្ទាប់ពីការបោះឆ្នោតជុំទីមួយកាលពីថ្ងៃអាទិត្យកន្លងមកនេះ៕