កូនប្រុសចម្បងរបស់លោកនាយករដ្ឋមន្ត្រី ហ៊ុន សែន បានព្យាយាមបញ្ចុះបញ្ចូលក្រុមមេដឹកនាំជប៉ុន និងអតីតមេអង្គការសហប្រជាជាតិប្រចាំកម្ពុជា ដោយថា បានបកស្រាយអំពីស្ថានភាពពិតនៅកម្ពុជាប្រាប់ទៅដល់ភាគីជប៉ុន។
នៅលើទំព័រហ្វេសប៊ុករបស់លោកដែលអមទៅដោយរូបថតជាច្រើនសន្លឹកផងនោះ លោក ហ៊ុន ម៉ាណែត ដែលជាកូនប្រុសច្បងលោក ហ៊ុន សែន បានរៀបរាប់ថា លោកបានជួបពិភាក្សាជាមួយលោក យ៉ាស៊ូហ្ស៊ី អាកាស៊ី អតីតប្រធានអាជ្ញាធរបណ្ដោះអាសន្នអង្គការសហប្រជាជាតិនៅកម្ពុជា ហៅកាត់ថា អ៊ុនតាក់ (UNTAC) និងអនុរដ្ឋមន្ត្រីការបរទេសជប៉ុន លោក កាហ្សូយូគី ណាកាណេ នៅឯទីក្រុងតូក្យូកាលពីថ្ងៃម្សិលមិញ។
លោក ហ៊ុន ម៉ាណែត បានរៀបរាប់ថា លោកបានជជែកជាមួយលោក អាកាស៊ី អំពីស្ថានការណ៍នយោបាយពិតនៅកម្ពុជា និងការប្ដេជ្ញាចិត្តរបស់រដ្ឋាភិបាលកម្ពុជាក្នុងការថែរក្សាសន្តិភាព ពង្រឹងលទ្ធិប្រជាធិបតេយ្យផ្អែកលើនីតិរដ្ឋ និងការពារអធិបតេយ្យភាព និងឯករាជ្យជាតិរបស់កម្ពុជា។
ជាងនេះទៅទៀត លោក ហ៊ុន ម៉ាណែត អះអាងលើហ្វេសប៊ុកថា លោកក៏បានជួបពិភាក្សាជាមួយក្រុមសមាជិកអន្តរសភាជប៉ុនផងដែរនៅថ្ងៃព្រហស្បតិ៍នេះ។
លោក ម៉ាណែត បានរៀបរាប់ថា លោកក៏បានប្រាប់អំពីស្ថានភាពពិតប្រាកដនៅកម្ពុជាទៅក្រុមសមាជិកសភាជប៉ុនផងដែរ ហើយថា អ្នកនយោបាយកម្ពុជាមួយចំនួន បានបំភ្លៃការពិតនាពេលកន្លងមក។
បើទោះបីជាលោក ម៉ាណែត មិនបានលើកឡើងពីក្រុមអ្នកនយោបាយបក្សប្រឆាំងដោយចំៗក្ដី ប៉ុន្តែ ជំនួបរបស់លោកជាមួយក្រុមមន្ត្រីជប៉ុន បានកើតឡើងក្រោយពីក្រុមមេដឹកនាំអតីតគណបក្សសង្គ្រោះជាតិ មានទាំងលោក សម រង្ស៊ី និងកញ្ញា កឹម មនោវិទ្យា ផងដែរ បានធ្វើដំណើរទៅប្រទេសជប៉ុន និងបានជំរុញទៅក្រុមមេដឹកនាំជប៉ុន ឲ្យជួយស្ដារលទ្ធិប្រជាធិបតេយ្យនៅកម្ពុជាឡើងវិញ។
ដំណើររបស់លោក ម៉ាណែត ទៅកាន់ប្រទេសជប៉ុន ក៏បានកើតឡើងក្រោយពីតំណាងពិសេសរដ្ឋាភិបាលជប៉ុន និងរដ្ឋមន្ត្រីការបរទេសជប៉ុន លោក តារ៉ូ កូណូ បានថ្លែងថា ជប៉ុនចង់ឃើញការបោះឆ្នោតដោយសេរីត្រឹមត្រូវ និងយុត្តិធម៌នៅកម្ពុជា បន្ទាប់ពីលោកជួបជាមួយលោក ហ៊ុន សែន នៅរាជធានីភ្នំពេញកាលពីដើមខែមេសានេះ។
ទាំងក្រុមបក្សប្រឆាំង និងក្រុមបក្សកាន់អំណាច សុទ្ធតែព្យាយាមពន្យល់ទៅក្រុមមន្ត្រីជាន់ខ្ពស់ជប៉ុនអំពីស្ថានការណ៍នយោបាយកម្ពុជា ជាមួយនឹងអំណះអំណាងរៀងៗខ្លួន បន្ទាប់ពីគណបក្សសង្គ្រោះជាតិ ដែលទទួលបានសំឡេងឆ្នោតពីពលរដ្ឋប្រហែលពាក់កណ្ដាលប្រទេស ត្រូវបានតុលាការកំពូលសម្រេចរំលាយចោលកាលពីខែវិច្ឆិកាឆ្នាំមុន ហើយមេដឹកនាំបក្សនេះគឺលោក កឹម សុខា នៅតែស្ថិតនៅក្រោមការឃុំខ្លួនអស់រយៈពេលជាង ៧ខែមកហើយនោះ៕
