រដ្ឋមន្ត្រីការបរទេសរបស់អូស្ត្រាលី លើកឡើងថា ពេលនេះសហរដ្ឋអាមេរិកកំពុងមានការភ័យខ្លាច ចំពោះការប្រណាំងប្រជែងលើអាវុធនុយក្លេអ៊ែនៅក្នុងតំបន់អាស៊ីប៉ាស៊ីភិច ដែលបច្ចុប្បន្នកំពុងតែបង្កឡើងដោយរដ្ឋអំណាចទីក្រុងព្យុងយ៉ាង។
កូរ៉េខាងជើងបានបាញ់សាកល្បងអាវុធមីស៊ីលជាបន្តបន្ទាប់នៅដើមឆ្នាំនេះ គឺរួមបញ្ជូលទាំងមីស៊ីល Hwasong-12 ក្នុងកម្រិតមធ្យមបានបាញ់សាកល្បងនៅឆ្នាំនេះ ហើយត្រូវបានកូរ៉េខាងជើងបញ្ជាក់ថា បាញ់បានជោគជ័យ អាចនាំក្បាលគ្រាប់នុយក្លេអ៊ែបានធំជាងមុន។ ករណីនេះ ធ្វើឲ្យមានបញ្ហាប្រឈមកាន់តែខ្លាំងជាមួយសហរដ្ឋអាមេរិក។
រដ្ឋមន្ត្រីការបរទេសរបស់ អូស្ត្រាលី លោកស្រី Julie Bishop ថ្លែងប្រាប់សារព័ត៌មាន Australian newspaper ថា ក្នុងពេលលោកស្រីធ្វើដំណើរទស្សនកិច្ចទៅញូយ៉ក លោកស្រីជួបជាមួយឯកអគ្គរដ្ឋទូតរបស់អាមេរិកប្រចាំនៅអង្គការសហប្រជាជាតិ។ លោកស្រីថា ក្នុងជំនួបនោះ មានការជជែកពីបញ្ហាអាវុធនុយក្លេអ៊ែរនៅកូរ៉េខាងជើង ហើយបានពិនិត្យលទ្ធភាពតិចតួចក្នុងការរារាំងមិនឲ្យគំរាមកំហែងដល់ប្រទេសជប៉ុន និង កូរ៉េខាងត្បូង។
លោកស្រីថា សហរដ្ឋអាមេរិកនៅតែបង្ហាញជំហរក្នុងការជជែកដោះស្រាយបញ្ហាអាវុធនុយក្លេអ៊ែជាមួយកូរ៉េខាងជើង ប៉ុន្តែថា នៅតែអាចប្រើកម្លាំងទ័ពអន្តរាគមន៍បើសិនជាករណីចាំបាច់តម្រូវឲ្យប្រើនោះ៕
