លោកនាយករដ្ឋមន្ត្រី ហ៊ុន សែន នៅព្រឹកថ្ងៃចន្ទនេះ បានបញ្ជាឲ្យចាប់ខ្លួន អ្នកបង្ហោះសារនៅលើហ្វេសប៊ុកថា លោកបានទទួលមរណភាព ក្នុងហេតុការណ៍ធ្លាក់យន្ដហោះមួយ ខណៈធ្វើដំណើរ ត្រឡប់មកពីប្រទេសវៀតណាមកាលពីចុងសប្តាហ៍មុន។
ក្នុងពិធីចែកវិញ្ញាបនបត្រ ដល់សិស្សសាលាភូមិន្ទរដ្ឋបាលនៅព្រឹកនេះ លោក ហ៊ុន សែន បានពន្យល់អ្នកសរសេរថាលោកធ្លាក់យន្តហោះស្លាប់នោះប្រញាប់ «រត់ឲ្យលឿន ក្រែងលោគេទៅទាន់»។
ជាមួយគ្នានោះលោកបានបញ្ជាឲ្យចាប់ខ្លួនអ្នកសរសេរលើហ្វេសប៊ុកដែលប្រមាថជីវិតលោកនោះ ទៅតុលាការកាត់ទោស។
កាលពីថ្ងៃទី២៥ មិថុនា មានហ្វេសប៊ុកមួយដែលមានឈ្មោះថា កម្មវិធីឡប់ៗ តែសប្បាយ បានបង្ហោះនៅលើហ្វេសបុករបស់ខ្លួន ដោយមានវីដេអូមួយ ជាមួយរូបថត៣សន្លឹក ថាលោកនាយករដ្ឋមន្ត្រីហ៊ុន សែន បានទទួលមរណៈភាពកាលពីថ្ងៃទី២៤ ពេលដែលលោកធ្វើដំណើរមកពីប្រទេសវៀតណាម។
កាលពីឆ្នាំ២០១៦ កន្លងទៅសាលាដំបូងខេត្តបាត់ដំបង បានចោទប្រកាន់ស្ត្រីម្នាក់ ឈ្មោះ ប៉ាង ស៊ីណា ពីបទជេរប្រមាថ បន្ទាប់ពីបង្ហោះសារមួយលើទំព័រហ្វេសប៊ុករបស់គាត់ដែលថា លោកនាយករដ្ឋមន្រ្តី ហ៊ុន សែន បានស្លាប់ក្នុងហេតុការណ៍ធ្លាក់យន្តហោះ ក្នុងពេលលោកធ្វើដំណើរទៅប្រទេសម៉ាឡេស៊ី៕