ខណៈដែលការប្រយុទ្ធគ្នារវាងកងទ័ពរដ្ឋាភិបាលហ្វីលីពីន និងពួកឧទ្ទាមនៅទីក្រុងម៉ារ៉ាវី បានឈានចូលដល់ខែទីបីហើយនោះ រដ្ឋាភិបាលម៉ាឡេស៊ីបានប្រកាសថា ប្រទេសនេះនឹងបញ្ជូនជំនួយបន្ថែមទៀតទៅភាគខាងត្បូងហ្វីលីពីន ដើម្បីជួយដល់ប្រជាជនរត់គេចចេញពីផ្ទះសម្បែងរបស់ពួកគេ ដោយសារតែការឡោមព័ទ្ធរបស់ពួកឧទ្ទាម។
សារព័ត៌មានសិង្ហបុរី Channel News Asia បានចុះផ្សាយថា រដ្ឋមន្ត្រីការពារជាតិម៉ាឡេស៊ី លោក ហ៊ីសហាំមូឌីន ហ៊ូសេន បានអំពីការបញ្ជូនជំនួយទៅឲ្យប្រជាជនហ្វីលីពីនបែបនេះ កាលពីថ្ងៃម្សិលមិញនេះ។ មន្ត្រីជាន់ខ្ពស់ម៉ាឡេស៊ីរូបនេះ បាននិយាយថា ផ្អែកតាមរបាយការណ៍ដែលលោកទទួលបាន ប្រជាជនភៀសខ្លួននៅទីក្រុងម៉ារ៉ាវី ត្រូវការទឹកស្អាត និងជំនួយវេជ្ជសាស្ត្រ។
សារព័ត៌មានសិង្ហបុរីនេះ បានចុះផ្សាយបន្តថា នៅក្នុងបេសកកម្មមនុស្សធម៌ជាលើកទីពីរនេះរបស់ខ្លួន ម៉ាឡេស៊ីនឹងបញ្ជូនឧបករណ៍ចម្រោះទឹកស្អាត និងជំនួយខាងវេជ្ជសាស្ត្រ ទៅទីក្រុងម៉ារ៉ាវី ក្នុងនោះមានទាំងក្រុមសាសនិកមកពីផ្នែកយោធាផងដែរ។
ផ្នែកខ្លះនៃទីក្រុងម៉ារ៉ាវី នៅភាគខាងត្បូងហ្វីលីពីន ត្រូវបានក្រុមឧទ្ទាមជ្រុលនិយមដណ្ដើមកាន់កាប់អស់រយៈពេល ៣ខែមកហើយ គិតចាប់តាំងថ្ងៃទី២៣ ខែឧសភាមក ហើយការប្រយុទ្ធគ្នានៅទីនោះ បានបណ្ដាលឲ្យមនុស្សជាង ៥០០នាក់ហើយ បាត់បង់ជីវិត៕
