ប្រទេសប៉ាណាម៉ា បានប្រកាសកាលពីថ្ងៃម្សិលមិញថា ខ្លួនបានបើកស្ថានទូតនៅក្នុងប្រទេសចិនហើយ បន្ទាប់ពីកាត់ផ្ដាច់ទំនាក់ទំនងកាទូតជាមួយដែនដីកោះតៃវ៉ាន់ កាលពីខែមិថុនាកន្លងមកថ្មីៗនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានឃើញសេចក្ដីប្រកាសព័ត៌មានមួយរបស់ក្រសួងការទេសប៉ាណាម៉ា ដែលបានរៀបរាប់ថា ការបើកស្ថានទូតរបស់ខ្លួននៅប្រទេសចិន ត្រូវបានធ្វើឡើងស្របទៅតាមគោលការណ៍នៃទំនាក់ទំនងកាទូតរវាងប្រទេសទាំងពីរ។
សេចក្ដីប្រកាសព័ត៌មាននេះ ត្រូវបានធ្វើឡើង ស្របពេលដែលគណៈប្រតិភូនៃវិនិយោគិនចិន កំពុងស្ថិតក្នុងដំណើរបំពេញទស្សនកិច្ចនៅក្នុងប្រទេសប៉ាណាម៉ា ដើម្បីស្វែងរកឱកាសវិនិយោគ។
ប្រធានាធិបតីប៉ាណាម៉ា លោក Juan Carlos Varela បានប្រកាសកាលពីថ្ងៃទី១២ ខែមិថុនាថា ប្រទេសលោកបានបើកទំនាក់ទំនងកាទូតជាមួយប្រទេសចិន។ នេះមានន័យថា ប្រទេសនេះបានកាត់ផ្ដាច់ចំណងកាទូតជាមួយកោះតៃវ៉ាន់ ដែលក្រុងប៉េកាំងចាត់ទុកជាអាណាខេត្តមួយរបស់ខ្លួន។
ចិនបានក្លាយជាអ្នកប្រើប្រាស់ព្រែកជីកប៉ាណាម៉ាធំលំដាប់ទីពីរ បន្ទាប់ពីសហរដ្ឋអាមេរិក។
បច្ចុប្បន្ននេះ ចិនគឺជាដៃគូពាណិជ្ជកម្មធំលំដាប់ទីបួនជាមួយប្រទេសប៉ាណាម៉ា ដែលបាននាំចូលទំនិញពីប្រទេសចិនមានតម្លៃ ១២០០លានដុល្លារនៅរៀងរាល់ឆ្នាំ និងបាននាំចេញទៅចិនវិញមានតម្លៃ ៥០លានដុល្លារ៕