សេចក្ដីរាយការណ៍របស់ទីភ្នាក់ងារព័ត៌មាន AFP បានឲ្យដឹងថា ប៉ូលិសអន្តរជាតិ ឬអាំងទែប៉ូល បានរឹបអូសឱសថខុសច្បាប់ និងក្លែងក្លាយដល់ទៅ ២៥លានគ្រាប់ ដែលគិតជាប្រាក់មានតម្លៃជាង ៥១លានដុល្លារ នៅក្នុងប្រតិបត្តិការរយៈពេល ១សប្ដាហ៍នៅទូទាំងពិភពលោក។
ប៉ូលិសអន្តរជាតិ ដែលមានមូលដ្ឋាននៅទីក្រុងលីយ៉ុង បាននិយាយនៅក្នុងសេចក្ដីប្រកាសព័ត៌មានមួយថា ឱសថបំប៉នកម្លាំង ថ្នាំបំបាត់ការឈឺចាប់ កញ្ចក់គ្រាប់ភ្នែកក្លែងក្លាយ ថ្នាំឆ្កួតជ្រូក និងថ្នាំជំនួយភ្លូវភេទទម្ងន់ ១.២តោន ស្ថិតនៅក្នុងចំណោមឱសថដែលត្រូវបានរឹបអូសបាន។
AFP បានរាយការណ៍ថា ប្រតិបត្តិការ Pangea X ត្រូវបានរៀបចំឡើងដោយប៉ូលិសអន្តរជាតិ មន្ត្រីគយ និងអាជ្ញាធរសុខាភិបាល នៅតាមបណ្ដាប្រទេសចំនួន ១២៣ និងនាំទៅរកការចាប់ខ្លួនមនុស្សជាង ៤០០នាក់ នៅចន្លោះថ្ងៃទី១២ ដល់ថ្ងៃទី១៩ ខែកញ្ញានេះ។
ការដាក់លក់ឱសថដោយខុសច្បាប់នៅលើអនឡាញ ក៏ស្ថិតនៅក្នុងប្រតិបត្តិការនេះផងដែរ ដោយបានបិទវេបសាយជាង ៣៥០០ ហើយការផ្សព្វផ្សាយតាមអនឡាញជាង ៣០០០ទៀត ត្រូវបានផ្អាក។
ប្រមុខប៉ូលិសអន្តរជាតិប្រចាំទីក្រុងណាមីប៊ី លោក Immanuel Sam បាននិយាយថា នេះគឺជាលើកដំបូងហើយដែលប្រទេសអាហ្វ្រិកជាច្រើនបានចូលរួមក្នុងប្រតិបត្តិការនេះ៕