សេចក្ដីរាយការណ៍ បានឲ្យដឹងថា គណៈកម្មាធិការមួយនៅក្នុងសភាអាមេរិក បានស្នើសុំព័ត៌មានពីសេតវិមានកាលពីថ្ងៃម្សិលមិញ ទាក់ទងទៅនឹងសេចក្ដីរាយការណ៍ថា ក្រុមមន្ត្រីជាន់ខ្ពស់ បានប្រើប្រាស់អ៊ីម៉ែលឯកជន សម្រាប់ការងាររដ្ឋាភិបាល។
ទីភ្នាក់ងារព័ត៌មាន Reuters បានចុះផ្សាយថា ក្រុមមេដឹកនាំនៃគណៈកម្មាធិការត្រួតពិនិត្យមកពីបក្សសាធារណរដ្ឋ និងបក្សប្រជាធិបតេយ្យ បានតាមដានសេចក្ដីរាយការណ៍របស់កាសែត Politico កាលពីថ្ងៃអាទិត្យកន្លងមកនេះ ដែលបានរាយការណ៍ថា កូនប្រសារប្រុស និងទីប្រឹក្សាជំនិតរបស់ប្រធានាធិបតី លោក ដូណាល់ ត្រាំ គឺលោក Jared Kushner និងក្រុមមន្ត្រីសេតវិមានទាំងបច្ចុប្បន្ន និងអតីតផង បានប្រើប្រាស់អ៊ីម៉ែលផ្ទាល់ខ្លួន សម្រាប់ការងាររដ្ឋាភិបាល។
ក្នុងលិខិតផ្ញើទៅសេតវិមាន ប្រធានគណៈកម្មាធិការនេះ សមាជិកសភាបក្សសាធារណរដ្ឋ លោក Trey Gowdy និងសមាជិកសភាបក្សប្រជាធិបតេយ្យ លោក Elijah Cummings បាននិយាយថា ពួកគេនឹងត្រួតពិនិត្យមើលថា តើក្រុមមន្ត្រីជាន់ខ្ពស់ក្នុងរដ្ឋបាលលោក ត្រាំ កំពុងព្យាយមគេចចេញពីច្បាប់តាមរយៈការប្រើប្រាស់អ៊ីម៉ែលផ្ទាល់ខ្លួន ឬក៏អ៊ីម៉ែលផ្សេងទៀត ដើម្បីបំពេញការងាររដ្ឋាភិបាល ឬក៏មិនមែន។
កាសែត Politico បានរាយការណ៍ថា អ៊ីម៉ែលលោក Kushner មានទាំងការប្រើសម្រាប់ផ្ដល់ព័ត៌មានដល់ប្រព័ន្ធផ្សព្វផ្សាយ គម្រោងព្រឹត្តិការណ៍ និងរឿងរ៉ាវដទៃទៀត។ មេធាវីលោក Kushner គឺលោក Abbe Lowell បាននិយាយថា កូនក្ដីរបស់លោក បានអនុវត្តបទប្បញ្ញត្តិរបស់រដ្ឋាភិបាល តាមរយៈការបញ្ជូនអ៊ីម៉ែលទាំងអស់ចូលទៅគណនីអ៊ីម៉ែលផ្លូវការរបស់លោក។
អំឡុងយុទ្ធនាការឃោសនាបោះឆ្នោតឆ្នាំ២០១៦ លោក ត្រាំ បានវាយប្រហារលើបេក្ខនារីអ្នកស្រី Hillary Clinton ចំពោះការប្រើប្រាស់អ៊ីម៉ែលផ្ទាល់ខ្លួន សម្រាប់ទំនាក់ទំនងផ្លូវការ នៅពេលអ្នកស្រីនៅកាន់តំណែងជារដ្ឋមន្ត្រីការបរទេស នៅក្រោមប្រធានាធិបតី បារ៉ាក់ អូបាម៉ា៕
