ឆ្មាំគុកព្រៃសរបានដឹកជនជាប់ចោទមកចូលរួមសវនាការដោយមានការភ័ន្ដច្រឡំ ពោលមិនបានដឹកលោក ហុង សុខហួរ សមាជិកព្រឹទ្ធសភាបក្សប្រឆាំងមកកាន់សវនាការនៅព្រឹកនេះតាមពេលកំណត់នោះទេ។
អ្នកយកព័ត៌មាន VOD បានឲ្យដឹងថា ការដឹកជនសង្ស័យច្រឡំនេះ មានការលើកឡើងថាមកពីមានកំហុសបច្ចេកទេសផ្នែករដ្ឋបាល។
យ៉ាងណាក៏ដោយ ឆ្មាំគុកបានត្រឡប់ទៅយកលោក ហុង សុខហួរ វិញ ប៉ុន្តែមានការយឺតពេល។
ករណីនេះ លោក សុន ឆ័យ ប្រធានក្រុមតំណាងរាស្ដ្រនៃគណបក្សសង្គ្រោះជាតិដែលទៅចាំស្តាប់សវនាការបានសម្ដែងការសោកស្ដាយ ដោយលោកបានហៅថាជាកំហុសមួយរបស់តុលាការនិងឆ្មាំពន្ធធនាគារ ដែលមិនគួរកើតមាននោះទេ។ លោកបញ្ជាក់ថា ករណីរបស់លោក ហុង សុខហួរ គឺជាបញ្ហារបស់ជាតិកម្ពុជាដែលមិនមែនជារឿងលេងសើចឡើយ។
លោក ហុង សុខហួរ ត្រូវបានសមត្ថកិច្ចចាប់ខ្លួនកាលពីព្រឹកថ្ងៃទី១៥ សីហា ឆ្នាំ២០១៥ បន្ទាប់ពីលោកនាយករដ្ឋមន្ដ្រី ហ៊ុន សែន ចោទលោកថាជនក្បត់ជាតិ បន្ទាប់ពីលោកបង្ហោះផែនទីសន្ធិសញ្ញាព្រំដែនកម្ពុជា-វៀតណាម ឆ្នាំ១៩៧៩។
តុលាការចោទសមាជិកព្រឹទ្ធសភាគណបក្សប្រឆាំងរូបនេះពីបទក្លែងឯកសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់បង្កឱ្យមានភាពវឹកវរក្នុងសង្គម៕