មជ្ឈមណ្ឌលសិទ្ធិមនុស្សកម្ពុជា ហៅកាត់ថា CCHR បានអះអាងថា ខ្លួនប្រកាន់ខ្ជាប់នូវជំហរឯករាជ្យរបស់ខ្លួនពីគណបក្សនយោបាយទាំងអស់ ហើយប្ដេជ្ញាបន្តលើកកម្ពស់សិទ្ធិមនុស្សនៅក្នុងប្រទេសកម្ពុជា។
អង្គការសិទ្ធិមនុស្សមួយនេះ បានបញ្ជាក់ជំហររបស់ខ្លួនបែបនៅក្នុងសេចក្ដីថ្លែងការណ៍មួយចេញនៅរសៀលថ្ងៃនេះ តែប៉ុន្មានម៉ោងប៉ុណ្ណោះ បន្ទាប់ពីលោកនាយករដ្ឋមន្ត្រី ហ៊ុន សែន បានបញ្ជាផ្ទាល់មាត់ទៅក្រសួងមហាផ្ទៃ ឲ្យពិនិត្យមើលផ្លូវច្បាប់ ដើម្បីបិទអង្គការមួយនេះ ដោយចោទថា អង្គការមួយនេះ ត្រូវបានបង្កើតឡើងក្រោមការបង្គាប់បញ្ជាពីជនបរទេស។
នៅក្នុងជំនួបសំណេះសំណាលជាមួយក្រុមកម្មករកម្មការិនីនៅព្រឹកថ្ងៃអាទិត្យនេះ លោក ហ៊ុន សែន បានថ្លែងថា៖ «ការពិតមជ្ឈមណ្ឌលសិទ្ធិមនុស្សនៅទីក្រុងភ្នំពេញ អាហ្នឹងត្រូវតែបិទចោល ព្រោះអាហ្នឹងធ្វើតាមបរទេសណា! អាហ្នឹងគួរមើល! ក្រសួងមហាផ្ទៃគួរមើល! ព្រោះអាហ្នឹងគឺថា បរទេសជាអ្នកឲ្យបង្កើតណា មិនមែនខ្មែរអ្នកបង្កើតទេ! បរទេសជាអ្នកឲ្យបង្កើតណា! មើលអាមជ្ឈមណ្ឌលសិទ្ធិមនុស្សនៅភ្នំពេញហ្នឹងមួយទៀត។ […] អញ្ចឹងទេ អានេះបរទេសឲ្យបង្កើត អាហ្នឹងវាខុសរឿង»។
មជ្ឈមណ្ឌលសិទ្ធិមនុស្ស បានអះអាងនៅក្នុងសេចក្ដីថ្លែងការណ៍របស់ខ្លួនថា ខ្លួនប្រកាន់ខ្ជាប់នូវឯករាជ្យភាពពីបក្សនយោបាយទាំងអស់ ហើយប្ដេជ្ញាលើកកម្ពស់បញ្ហាសិទ្ធិមនុស្ស ដោយឈរលើគោលការណ៍ច្បាស់លាស់។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានរៀបរាប់នៅលើគណនីហ្វេសប៊ុករបស់អ្នកស្រីថា អតីតបុគ្គលិកអង្គការមួយនេះ បានចាកចេញ និងចូលប្រឡូកក្នុងនយោបាយទាំងខាងគណបក្សប្រឆាំង និងបក្សកាន់អំណាច ប៉ុន្តែ អ្នកស្រីថា មជ្ឈមណ្ឌលរបស់អ្នកស្រី មិនស្ថិតក្រោមឥទ្ធិពលរបស់អ្នកនយោបាយទាំងនោះទេ។
អ្នកស្រីជឿជាក់ថា ការស៊ើបអង្កេតដោយឯករាជ្យពេញលេញណាមួយទៅលើស្ថាប័នមួយនេះ នឹងរកឃើញថា ស្ថាប័ននេះមិនបានប្រព្រឹត្តខុសដូចការចោទប្រកាន់នោះឡើយ។
មជ្ឈមណ្ឌលសិទ្ធិមនុស្សកម្ពុជា ត្រូវបានបង្កើតឡើងនៅក្នុងឆ្នាំ២០០២ ដោយលោក កឹម សុខា ដែលក្រោយមកបានលាឈប់ និងទៅបង្កើតគណបក្សសិទ្ធិមនុស្សនៅក្នុងឆ្នាំ២០០៧។
ការបញ្ជាពីសំណាក់លោក ហ៊ុន សែន ឲ្យពិនិត្យមើលផ្លូវច្បាប់សម្រាប់បិទមជ្ឈមណ្ឌលសិទ្ធិមនុស្សបែបនេះ បានកើតឡើងតែពីរបីខែប៉ុណ្ណោះក្រោយពីរដ្ឋាភិបាលកម្ពុជា បានសម្រេចបិទអង្គការសង្គមស៊ីវិលបរទេសមួយចំនួនដែលដំណើរការនៅក្នុងប្រទេសកម្ពុជា។
លោក ហ៊ុន សែន បានបញ្ជាឲ្យបិទអង្គការសិទ្ធិមនុស្សបែបនេះ បន្ទាប់ពីការចាប់ខ្លួនមេដឹកនាំអតីតបក្សប្រឆាំង លោក កឹម សុខា ដែលត្រូវបានរដ្ឋាភិបាលចោទថា «ក្បត់ជាតិ» និង «ឃុបឃិតជាមួយជនបរទេស» មានគោលបំណងផ្ដួលរំលំរដ្ឋាភិបាលស្របច្បាប់។
ទោះជាយ៉ាងណា ការបង្ក្រាបទៅលើអង្គការសង្គមស៊ីវិល គណបក្សប្រឆាំង សកម្មជនសិទ្ធិមនុស្ស និងសកម្មជនដទៃទៀត បានជំរុញឲ្យមានការរិះគន់ពីសហគមន៍អន្តរជាតិ ដោយចាត់ទុកថា កម្ពុជាកំពុងធ្វើដំណើរចាកឆ្ងាយពីគន្លងប្រជាធិបតេយ្យ៕
