តំណាងរាស្ត្របក្សប្រឆាំងមួយរូប ប្រកាសអនុញ្ញាតឲ្យអង្គការមួយដែលធ្វើការផ្នែកលើកកម្ពស់តម្លាភាពសង្គម អាចសម្ភាស ថត និងផ្សព្វផ្សាយព័ត៌មានពីទ្រព្យសម្បត្តិរបស់លោកឲ្យសាធារណជនបានដឹង ដើម្បីបង្ហាញពីសុចរិតភាពរបស់លោកចំពោះប្រជាពលរដ្ឋ។
ក្នុងលិខិតចំហរបស់លោក លិម គឹមយ៉ា តំណាងរាស្ត្រគណបក្សសង្គ្រោះជាតិមណ្ឌលកំពង់ធំ ចុះថ្ងៃ២៤ ខែធ្នូ ឆ្នាំ២០១៦ បានលើកឡើងថា លោកអនុញ្ញាតឲ្យអង្គការគណនេយ្យភាពកម្ពុជា អាចផ្សព្វផ្សាយទ្រព្យសម្បត្តិលោកជាសាធារណៈបាន។ លោកក៏ជំរុញឲ្យអ្នកដឹកនាំផ្សេងៗទៀត នៅក្នុងអង្គនីតិបញ្ញត្តិ នីតិប្រតិបត្តិ និងតុលាការ ប្រកាសទ្រព្យសម្បត្តិជាសាធារណៈ ដើម្បីបង្ហាញភាពត្រឹមត្រូវនិងជាគំរូល្អក្នុងការដឹកនាំ។
កន្លងទៅអង្គភាពប្រឆាំងអំពើពុករលួយរបស់រដ្ឋាភិបាលធ្លាប់បកស្រាយថា ការប្រកាសទ្រព្យសម្បត្តិដោយអសាធារណៈនៅពេលបច្ចុប្បន្ននេះ គឺគ្រប់គ្រាន់ហើយក្នុងការប្រឆាំងអំពើពុករលួយ ហើយថាការប្រកាសជាសាធារណៈ បារម្ភពីសុវត្ថិភាពរបស់ម្ចាស់ទ្រព្យសម្បត្តិទាំងនោះ។
របាយការណ៍អង្គការគណនេយ្យភាពកម្ពុជាឲ្យដឹងថា គិតត្រឹមចុងឆ្នាំ២០១៦នេះ បុគ្គលិកអង្គការសង្គមស៊ីវិល បុគ្គលិកក្រុមហ៊ុន មន្ត្រីរដ្ឋ មន្ត្រីគណបក្សមានចំនួនជាង៤០នាក់ បានស្ម័គ្រចិត្តប្រកាសទ្រព្យសម្បត្តិខ្លួនជាសាធារណៈ។ លោក គុយ មាសសំណាង ប្រធានអង្គការគណនេយ្យភាពកម្ពុជាបញ្ជាក់ថា សាធារណជនពិសេសថ្នាក់ដឹកនាំគណបក្សនយោបាយអាចប្រកាសទ្រព្យជាសាធារណៈជាមួយគេហទំព័ររបស់អង្គការគណនេយ្យភាពកម្ពុជាឬអាចប្រកាសលើគេហទំព័រផ្ទាល់ខ្លួនក៏បាន ដើម្បីឲ្យសាធារណជនបានដឹង បង្ហាញតម្លភាព៕