ក្រសួងអប់រំថៃដាក់ចេញគោលនយោបាយពង្រឹងស្រុកមួយអាហាររូបករណ៍មួយ ជាគម្រោងពង្រឹងការអប់រំជាអន្តរជាតិ ដើម្បីជួយលើកកម្ពស់ដល់សិស្សក្រីក្រនៅតាមភូមិឃុំនៅតំបន់ផ្សេងៗ អាចមានឱកាសទទួលការអប់រំ ដូចកូនអ្នកមានទ្រព្យសម្បត្តិដទៃទៀត។
ឧបនាយករដ្ឋមន្ត្រីដែលទើបបានតែងតាំងថ្មីៗនេះឲ្យដឹកនាំក្រសួងអប់រំ លោក Panadda Diskul ថ្លែងថា លោកបានដាក់ចេញកម្មវិធីអាហាររូបករណ៍លើកទី៥ ដើម្បីបង្កើនទំហំនៃការជួយសិស្សក្រីក្រអាចរៀនសូត្របានចប់ចុងចប់ដើម។ ទន្ទឹមនឹងការដាក់ចេញគោលនយោបាយនេះ ក្រុមអ្នកតាមដានការងារជំរុញឲ្យមន្ត្រីមានសមត្ថកិច្ចស្រាវជ្រាវឲ្យពិតប្រាកដថា សិស្សណាខ្លះដែលត្រូវការជួយឧបត្ថម្ភដោយសារតែភាពក្រីក្រ។ នេះបើតាមសារព័ត៌មានបាងកកប៉ុស្តិ៍របស់ថៃ។
លោក Panadda ថ្លែងថា កម្មវិធីនេះផ្តោតសំខាន់លើសិស្សក្រីក្រដែលស្វះស្វែងបន្តការសិក្សានៅទូទាំងប្រទេស។
កម្មវិធីស្រុកមួយអាហាររូបករណ៍មួយ គឺបានដាក់ចេញតាំងពីរដ្ឋាភិបាលដឹកនាំដោយលោក ថាក់ ស៊ីន កាលពីឆ្នាំ២០០៤ ដែលមានបំណងជួយសិស្សថ្នាក់ វិទ្យាល័យ និងថ្នាក់បរិញ្ញាបត្រ ដែលមកពីគ្រួសារក្រីក្រ មកពីទូទាំងប្រទេសអាចមានលទ្ធភាពបន្តការសិក្សានៅក្រៅប្រទេស។
រដ្ឋាភិបាលយោធាបច្ចុប្បន្នបញ្ជាក់ថា មូលធីនិដែលប្រើសម្រាប់គាំទ្រដល់សិស្សក្រីក្រឲ្យបន្តការសិក្សានេះ គឺបានពីការលក់ឆ្នោតជាតិ ដូចគោលនយោបាយរបស់លោក ថាក់ ស៊ីន កាលពីជាង១០ឆ្នាំមុនដែរ៕
