ស្ថានទូតអាមេរិកនៅរាជធានីភ្នំពេញ និងការិយាល័យសម្រាប់ការសិក្សាអប់រំនៅសហរដ្ឋអាមេរិក (EducationUSA) នឹងរួមគ្នារៀបចំតាំងពិព័រណ៍ឆ្នាំ២០១៧ ស្តីពីការសិក្សាអប់រំនៅសហរដ្ឋអាមេរិក ដែលនឹងប្រព្រឹត្តិនៅថ្ងៃទី២៨ខែកុម្ភៈឆ្នាំ២០១៧ ចាប់ពីម៉ោង៣រសៀល ដល់ម៉ោង៧យប់ នៅសណ្ឋាគារអាំងទែកុងទីណង់តាល់ រាជធានីភ្នំពេញ។ នេះបើតាមសេចក្តីប្រកាសព័ត៌មានរបស់ស្ថានទូតអាមេរិកនៅរាជធានីភ្នំពេញ។
សេចក្តីប្រកាសព័ត៌មាននៅថ្ងៃនេះបន្តឲ្យដឹងថា តំណាងចំនួន២០រូបមកពីមហាវិទ្យាល័យ និងសាកលវិទ្យាល័យឈានមុខក្នុងសហរដ្ឋអាមេរិកនឹងជម្រាបជូនដល់សិស្សនិស្សិតកម្ពុជា ស្តីអំពីកម្មវិធីសិក្សានៅថ្នាក់ឧត្តមសិក្សា លក្ខខណ្ឌទាមទារក្នុងការចុះឈ្មោះចូលរៀន និងឱកាសអាហារូបករណ៍នៅសហរដ្ឋអាមេរិក។
សេចក្តីប្រកាសព័ត៌មានបញ្ជាក់ទៀតថា នឹងមានផ្តល់ព័ត៌មានស្តីពីទិដ្ឋាការ សម្រាប់សិស្សនិស្សិត កម្មវិធីផ្លាស់ប្តូរការសិក្សា និងអាហារូបករណ៏ជាដើម។
ការសិក្សាអប់រំនៅសហរដ្ឋអាមេរិក ឬ EducationUSA គឺជាដៃគូរវាងស្ថានទូតសហរដ្ឋអាមេរិក និងសាកលវិទ្យាល័យបញ្ញាសាស្រ្ត ដែលផ្តល់សេវាប្រឹក្សាផ្នែកអប់រំដោយឥតគិតថ្លៃដល់សិស្សនិស្សិតដែលចង់ទៅសិក្សានៅសហរដ្ឋអាមេរិក៕