តារាចម្រៀង និង សម្តែងល្បីរបស់អាមេរិកនាង Ariana Grandeថ្លែងថា នាងមានគម្រោងទៅសម្តែងនៅទីក្រុង Manchesterនៃប្រទេសអង់គ្លេសម្តងទៀត ដើម្បីប្រមូលថវិកាជួយជនរងគ្រោះដោយសារការវាយប្រហារនៅកន្លែងប្រគំតន្ត្រីកាលពីថ្ងៃចន្ទ។
នាង Ariana Grande ថ្លែងថា នាងចូលរួមរំលែកទុក្ខយ៉ាងក្រៀមក្រំ ជាមួយជនរងគ្រោះករណីវាយប្រហារនៅ Manchesterកាលពីថ្ងៃចន្ទដើមសប្តាហ៍ បណ្តាលឲ្យមនុស្សចំនួន២២នាក់ស្លាប់ និង ៤៦នាក់រងរបួស។ នាងថា មិនចង់ឈប់សម្រាកទេនៅឆ្នាំនេះ គឺត្រូវធ្វើអ្វីដើម្បីជួយដោះស្រាយទុក្ខលំបាកអ្នកគាំទ្រនាង ឲ្យទទួលបានភាពប្រសើរឡើង។
ការប្រគំតន្ត្រីមួយនៅក្នុងទីក្រុង Manchester នៅភាគពាយព្យនៃប្រទេសអង់គ្លេស រងគ្រោះដោយសារការវាយប្រហារដោយបំផ្ទុះគ្រាប់បែក។ ក្រោយហេតុការណ៍នេះ សមត្ថកិច្ចបានស្វែងរកអ្នកពាក់ព័ន្ធដោយចាប់ខ្លួនបានមនុស្សមួយចំនួន ព្រោះមានសញ្ញាព្រមានថា អាចនឹងមានការវាយប្រហារនៅតំបន់សំខាន់ៗមួយចំនួនទៀតនៅទីក្រុងឡុងដ៍។
