នាយករដ្ឋមន្ត្រីវៀតណាមជំរុញជាថ្មីទៀតឲ្យរដ្ឋាភិបាលកម្ពុជាជួយទប់ស្កាត់កុំមានភាគីណាមួយប្រើប្រាស់ទឹកដីនៃប្រទេសកម្ពុជាទៅប្រឆាំងនឹងវៀតណាម។ នេះបើតាមសេចក្ដីប្រកាសព័ត៌មានស្តីពីលទ្ធផលដំណើរទស្សនៈកិច្ចរបស់ប្រធានរដ្ឋសភាកម្ពុជា លោក ហេង សំរិន នៅប្រទេសវៀតណាមកាលពីពេលថ្មីៗនេះ។
ក្នុងសេចក្ដីប្រកាសព័ត៌មានចុះថ្ងៃទី២៦ ខែមិថុនា ឆ្នាំ២០១៧ បន្ថែមថា ក្នុងជំនួបរវាងលោក ហេង សំរិន និងនាយករដ្ឋមន្ត្រីវៀតណាម គឺ«វៀតណាមស្នើឲ្យកម្ពុជាចាត់វិធានការបញ្ហាសន្តិសុខនៅតាមព្រំដែនឲ្យបានហ្មត់ចត់ បង្ក្រាបអំពើរត់ពន្ធឧក្រិដ្ឋកម្មឆ្លងដែន និងស្នើកុំឲ្យក្រុមអមិត្ត ឬអ្នកទីបីប្រើប្រាស់ទឹកដីនៃប្រទេសកម្ពុជាប្រឆាំងនឹងប្រទេសវៀតណាម»។
សេចក្ដីប្រកាសព័ត៌មានឲ្យដឹងបន្តថា វៀតណាមក៏ជំរុញការបោះបង្គោលព្រំដែន ដែលនៅមិនទាន់ឯកភាពនោះត្រូវចរចាគ្នា ដើម្បីបោះបង្គោលព្រំដែនបញ្ចប់ឲ្យបានឆាប់ៗ។
អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី មានប្រសាសន៍ថា ការស្នើរបស់វៀតណាមមិនមែនសំដៅទៅលើគណបក្សប្រឆាំងនោះ ដោយគណបក្សប្រឆាំងមិនមានឥទ្ធិពលទៅគំរាមកំហែងមរណភាពទឹកដីវៀតណាមនោះទេ។
លោកថា «បើយើងមើលទៅគណបក្សប្រឆាំង វាមិនមានអីទៅគំរាមកំហែងមោទណភាពទឹកដីប្រឆាំងនឹងរដ្ឋាភិបាលវៀតណាមនោះទេ ប៉ុន្តែយើងឃើញមានប្រភពពីរ អាចជាចលនាខ្មែរកម្ពុជាក្រោម ហើយមួយទៀតអាចជាចលនាបង្កប់របស់វៀតណាមសេរីអី ដែលយើងតែងតែលឺថាមានវៀតណាមសេរី អានេះជារឿងមួយដែលមានការព្រួយបារម្ភជាពិសេស បើយើងនិយាយពីវៀតណាមសេរី គឺវៀតណាមខាងត្បួង។ ចឹងសម្រាប់រដ្ឋាភិបាលវៀតណាមមានការព្រួយបារម្ភក៏ដូចប្រទេសអាចនឹងវិលទៅរកការបែងចែកទឹកដីជាពីរឡើងវិញ ជាការយល់របស់ខ្ញុំ»។
លោកកត់សំគាល់ថា នៅក្នុងជំនួបរវាងមេដឹកនាំប្រទេសទាំងពីរ ភាគីវៀតណាមតែងតែស្នើឲ្យកម្ពុជាជួយការពារពលរដ្ឋវៀតណាម និងបញ្ហាព្រំដែន ក៏ប៉ុន្តែសម្រាប់កម្ពុជាវិញមិនដែលស្នើអ្វីទៅវៀតណាមឡើយ។
ចំណែកអ្នកវិភាគនយោបាយវ័យក្មេង លោក ឆាំ ប៊ុនថេត យល់ថា ការស្នើរបស់វៀតណាមថាមិនឲ្យមានភាគីទី៣ប្រើប្រាស់ទឹកដីកម្ពុជាដើម្បីប្រឆាំងនឹងវៀតណាមនោះ លោកយល់ថាមិនសមស្របចំពោះស្ថានការណ៍បច្ចុប្បន្ននេះទេ ។ លោកថា «ខ្ញុំដូចអត់យល់ដែរ មិនដឹងថាមានក្រុមទី៣ ក្រុមទី៤ ដែលគេគិតមើលឃើញថាជាក្រុមដែលប្រឆាំងជាមួយវៀតណាម ឬក៏អាចជាក្រុមប្រឆាំង តែក្រុមប្រឆាំងជាពលរដ្ឋខ្មែរគាត់មានកាតព្វកិច្ចដើម្បីធ្វើការងារតតាំងនយោបាយនៅក្នុងប្រទេសរបស់ខ្លួនវាអត់មានអីខុសទេ។ ប៉ុន្តែប្រទេសទី៣ទៀត ខ្ញុំពិបាករាប់ដែរ ប្រទេសណាដែលជាកន្លែងឈររបស់ខ្មែរប្រឆាំងវៀតណាម វាអត់មាន ខ្ញុំក៏អត់យល់ដែលមិនដឹងថាគេធ្វើនេះមិនដឹងហេតុអីយើងអត់ដឹងដែរ»។
នៅក្នុងពិធីរំលឹកខួបលើកទី ៦៨ឆ្នាំនៃការបាត់បង់ទឹកដីកម្ពុជាក្រោម មន្ត្រីជាន់ខ្ពស់គណបក្សប្រឆាំងព្រះអង្គម្ចាស់ ស៊ីសុវត្ថិ ធម្មិកោ មានព្រះរាជបន្ទូលនៅចំពោះមុខពលរដ្ឋ និងព្រះសង្ឃថា នឹងទាមទារទឹកដីកម្ពុជាក្រោមពីវៀតណាមមកវិញ បើគណបក្សសង្គ្រោជាតិឈ្នះឆ្នោតនៅឆ្នាំ២០១៨ខាងមុខនេះ៕
