ចំនួនអ្នកស្លាប់នៅក្នុងគ្រោះថ្នាក់រញ្ជួយដី នៅប្រទេសអុីតាលី បានកើនឡើងដល់ ២៨១នាក់ហើយ ខណៈដែលប្រទេសនេះត្រៀមរៀបចំពិធីកាន់ទុក្ខជាតិ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
យោងតាម Reuters បានឲ្យដឹងថា ក្ដីសង្ឃឹមចំពោះការស្វែងរកជននៅរស់រានមានជីវិតបន្ថែមទៀត កាន់តែស្តួចស្តើងទៅហើយ កាលពីថ្ងៃម្សិលមិញ ខណៈដែលប្រតិបត្តិការជួយសង្គ្រោះនៅតំបន់មួយចំនួន ត្រូវបានបញ្ឈប់ទៅហើយ។
Reuters បានដកស្រង់សម្ដីនៃក្រសួងការពារស៊ីវិលនៅទីក្រុងរ៉ូម ដែលបាននិយាយថា មនុស្ស ៣៨៨នាក់ ស្ថិតនៅក្រោមការព្យាបាលរបួសនៅតាមមន្ទីរពេទ្យ ហើយអ្នករបួស ៤០នាក់ ស្ថិតក្នុងស្ថានភាពធ្ងន់ធ្ងរ។ មនុស្សប្រហែល ២៥០០នាក់ បានបាត់បង់ផ្ទះសម្បែងរបស់ពួកគេ ដោយសារតែរញ្ជួយដីដ៏ខ្លាំងក្លាកម្លាំង ៦.២រ៉ិចទ័រ កាលពី ៣ថ្ងៃមុន។
