អង្គការឃ្លាំមើលសិទ្ធិមនុស្សអន្តរជាតិ (HRW) អំពាវនាវឲ្យម្ចាស់ជំនួយ និងដៃគូអភិវឌ្ឍន៍ផ្សេងៗ ជួយជំរុញឲ្យរដ្ឋាភិបាលកម្ពុជា ដែលកំពុងដឹកនាំដោយលោកនាយករដ្ឋមន្ត្រី ហ៊ុន សែន ឲ្យបញ្ឈប់ការរារាំងនានា ក្នុងគោលបំណងមិនឲ្យលោក សម រង្ស៊ី មេដឹកនាំគណបក្សប្រឆាំងវិលចូលស្រុកវិញ។
ក្នុងសេចក្តីថ្លែងការណ៍អង្គការឃ្លាំមើលសិទ្ធិមនុស្សអន្តរជាតិចុះថ្ងៃទី២៥ ខែតុលា បានលើកឡើងថា រដ្ឋាភិបាលកម្ពុជាគួរតែបញ្ឈប់ជាបន្ទាន់ ក្នុងការរារាំងមិនឲ្យមេដឹកនាំគណបក្សប្រឆាំងលោក សម រង្ស៊ី វិលចូលស្រុកវិញ។
នាយកអង្គការឃ្លាំមើលសិទ្ធិមនុស្សអន្តរជាតិប្រចាំតំបន់អាស៊ី លោក Brad Adams ថ្លែងនៅក្នុងសេចក្តីថ្លែងការណ៍នោះថា ការជម្លៀសលោក សម រង្ស៊ី ឲ្យនៅក្រៅប្រទេសជាផ្លូវការនេះ នឹងប៉ះពាល់ដល់លទ្ធផល នៃការបោះឆ្នោតថ្នាក់ជាតិនៅពេលខាងមុខ គឺថា បើគណបក្សប្រជាជនឈ្នះការបោះឆ្នោត ក៏មិនមែនជាការប្រកួតប្រជែងពិតប្រាកដដែរ។ លោកក៏បានជំរុញឲ្យប្រទេសម្ចាស់ជំនួយនិងបណ្តាប្រទេសសមាជិកអាស៊ានផ្សេងៗទៀត ជួយជំរុញឲ្យលោកនាយករដ្ឋមន្ត្រី ហ៊ុន សែន បញ្ចាប់ការគំរាមកំហែងផ្នែកនយោបាយលើគណបក្សប្រឆាំង។
កាលពីថ្ងៃទី២៤ ខែតុលា តំណាងការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សនៅកម្ពុជាបានទាមទារឲ្យរដ្ឋាភិបាលកម្ពុជាបកស្រាយពីការចេញវិធានការទប់ស្កាត់មិនឲ្យប្រធានបក្សប្រឆាំងវិលត្រលប់មកកកម្ពុជាវិញមុនពេលបោះឆ្នោត ដោយអះអាងថាសេចក្តីសម្រេចរបស់រដ្ឋាភិបាលនេះគឺមិនសមហេតុផល។
ទោះយ៉ាងណា លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា ការហាមមិនឲ្យលោក សម រង្ស៊ី វិលចូលស្រុកវិញនេះ ជាវិធានការសមស្របព្រោះលោកថា បើលោក សម រង្ស៊ី មកដល់កម្ពុជាវិញ នឹងបង្កចលាចលផ្សេងៗ ដូចឆ្នាំ២០១៣។
គួរបញ្ជាក់ផងដែរថាកាលពីថ្ងៃទី១២ ខែតុលាកន្លងទៅ ទីស្តីការគណៈរដ្ឋមន្ត្រី បានចេញលិខិតមួយទៅកាន់អគ្គនាយកដ្ឋានអន្តោប្រវេសន៍ ក្នុងការទប់ស្កាត់កុំឲ្យលោក សម រង្ស៊ី ត្រឡប់ចូលស្រុកវិញបាន៕