ក្រុមអ្នកធ្វើការផ្នែកសិទ្ធិមនុស្សបានរាយការណ៍ថា បាតុករប្រឆាំងប្រធានាធិបតីវេណេហ្សូអេឡាជាង២០នាក់រងរបួស ដោយសារការវាយបង្រ្កាប និង៣៩នាក់ត្រូវបានចាប់ខ្លួន ក្នុងហេតុការណ៍តវ៉ាជាទ្រង់ទ្រាយធំនៅថ្ងៃនេះ។
មានសេចក្តីរាយការណ៍ថា ចំនួនរងរបួសត្រូវបានគេវាយដេកនៅនិងដី។ នេះបើតាមការចុះផ្សាយរបស់សារព័ត៌មាន BBC។
មនុស្សរាប់សែននាក់បាននាំគ្នាឡើងលើផ្លូវ ដើម្បីតវ៉ាប្រឆាំងរដ្ឋាភិបាលដែលកំពុងដឹកនាំដោយលោក Nicolas Maduro។ ផ្ទុះការតវ៉ាឡើងនេះ បន្ទាប់ពីមានការអំពាវនាវឲ្យមានការធ្វើប្រជាមតិមួយដែលបញ្ជាក់ពីការព្រមព្រៀងរបស់ប្រជាពលរដ្ឋឲ្យដកប្រធានាធិបតីបច្ចុប្បន្នចេញពីតំណែង។
សកម្មជនដែលប្រឆាំងរដ្ឋាភិបាលបានប្រមូលផ្តុំ ហើយបង្ហាញស្នាមហត្ថលេខាចំនួន២០០ ០០០នាក់ ដែលទាមទារឲ្យមានការធ្វើប្រជាមតិដកប្រធានាធិបតី។ ប៉ុន្តែមន្ត្រីរដ្ឋាភិបាលថា ការប្រមូលហត្ថលេខានោះមានការបន្លំច្រើន។
គណបក្សប្រឆាំងនៅក្នុងប្រទេសដែលជាបក្សដឹកនាំរដ្ឋសភា បានបោះឆ្នោតកាលពីថ្ងៃអង្គារ បើកឲ្យតុលាការអាចដំណើរការប្រឆាំងនិងប្រធានាធិបតីបច្ចុប្បន្ន ដោយចោទថាបំពានរដ្ឋធម្មនុញ្ញ។
អ្នកតវ៉ាបានប៉ះទង្គិចជាមួយសន្តិសុខស្ទើរទូទាំងប្រទេស ពិសេសនៅក្នុងក្រុងភាគខាងលិចដូចជានៅ San Cristobal និង Maracaibo។
អ្នកតវ៉ាម្នាក់ថ្លែងថា ការធ្វើប្រជាមតិគឺមានចែងនៅក្នុងរដ្ឋធម្មនុញ្ញ ហើយពួកគេបដិសេធ តើពួកគេកំពុងតែខ្លាចអី?
ពេលនេះបណ្តាញទំនាក់ទំនងសង្គមនៅក្នុងប្រទេសវេណេហ្សូអេឡា កំពុងតែចែករំលែកតៗគ្នា ពីរូបភាពនៃការបង្ក្រាបបង្ហូរឈាមលើបាតុករ។
មេដឹកនាំគណបក្សប្រឆាំងប្រកាសថា នៅថ្ងៃសុក្រស្អែកនេះ លោកនឹងដឹកនាំការដើរលើដងផ្លូវជាទ្រង់ទ្រាយធំ ប្រសិនជារដ្ឋាភិបាលនៅតែមិនព្រមរៀបចំឲ្យមានការធ្វើប្រជាមតិទៀតនោះ។
